തിരുവനന്തപുരം: ശബരിമല ക്ഷേത്രത്തിനെ അധിക്ഷേപിച്ച സണ്ണികപിക്കാടിനെതിരേ തിരുവിതാംകൂർ ദേവസ്വംബോർഡ് കേസുകൊടുക്കാത്തതെന്തുകൊണ്ടാണെന്ന് സുപ്രീംകോടതി അഭിഭാഷകൻ അഡ്വ. അഭിലാഷ്.എം.ആർ. ശരിയായി അന്വേഷിച്ചാൽ ശിക്ഷ ഉറപ്പാണെന്നിരിക്കെ, ഖേദ പ്രകടനം മാപ്പപേക്ഷയല്ലെന്നിരിക്കെ ക്ഷേത്ര സംരക്ഷണത്തിന് നിയമപ്രകാരം അധികാരമുള്ള ബോർഡ് മിണ്ടാതിരിക്കുന്നത് ശരിയല്ലെന്ന് അഡ്വ.അഭിലാഷ് ഫേസ്ബുക്കിൽ പ്രതികരിച്ചു. ഫേസ്ബുക്ക് കുറിപ്പ് ഇങ്ങനെ:
”ശബരിമല ക്ഷേത്രത്തിനെ അധിക്ഷേപിച്ച സണ്ണിക്കെതിരെ ദേവസ്വം ബോർഡ് എന്തേ നിയമനടപടി സ്വീകരിക്കുന്നില്ല?
സണ്ണി കപിക്കാട് ശബരിമല ക്ഷേത്രത്തിലെ അയ്യപ്പസ്വാമിയെ ബലാത്സംഗവീരൻ എന്ന് വിളിച്ചു ആക്ഷേപിച്ചിട്ടു ദിവസങ്ങൾ കഴിഞ്ഞു. തെമ്മാടിത്തരം വിളിച്ചു പറയാൻ ഇന്ത്യൻ ഭരണഘടന
അഭിപ്രായസ്വാതന്ത്ര്യം നൽകുന്നില്ല .ബിഎൻഎസിന്റെ 299 ആം വകുപ്പ് അനുസരിച്ചു ശിക്ഷാർഹമായ ഒരു കുറ്റത്തിന് (മറ്റു ചില വകുപ്പുകളും പ്രസക്തമാണ്) അഭിപ്രായസ്വാത്രത്ര്യത്തിന്റെ കുടപിടിക്കാൻ കഴിയില്ല.
നീതിയുക്തമായ അന്വേഷണം നടന്നാൽ ശിക്ഷ ഉറപ്പാക്കാൻ കഴിയുന്ന ക്രിമിനൽ കുറ്റം ആയിട്ട് കൂടിയും, പോലീസ് മുൻപോട്ടു പോകുന്നതായി കാണുന്നില്ല. പ്രതിക്ക് തെളിവുകൾ നശിപ്പിക്കാൻ ഉള്ള സമയം ആണ് കൊടുക്കപ്പെടുന്നത്. ശബരിമല ക്ഷേത്രത്തിന്റെ സംരക്ഷകനും ക്ഷേത്രത്തിന്റെ വരുമാനം കൊണ്ട് പരിപാലിക്കപ്പെടുന്നതുമായ ദേവസ്വം ബോർഡ് എന്തെ മൗനം പാലിക്കുന്നു. ശബരിമല ക്ഷേത്രസമുച്ഛയത്തിലെ ശ്രീകോവിലുകളുടെ ഭൗമികമായ ഘടനെയെ ചൂണ്ടിക്കാട്ടിയാണ് സണ്ണിയുടെ വൈകൃതം വർഷിക്കപ്പെട്ടത്. അവിടെ ആരാധിക്കപ്പെടുന്ന ബ്രഹ്മചാരിയായ ശ്രീ അയ്യപ്പനെയാണ് ഇയാൾ ബലാത്സംഗവീരൻ എന്ന് വിളിച്ചത്. ദേവസ്വം ബോർഡ് അംഗങ്ങളിൽ ഒരാളെക്കുറിച്ചു ഇത്തരം ഒരു വൈകൃതം ആരെങ്കിലും വിളമ്പിയാൽ അവർ നിയമനടപടി സ്വീകരിക്കില്ലേ ?
ശബരിമല ക്ഷേത്രത്തിന്റെ കസ്റ്റോഡിയൻ ആയ ദേവസ്വം ബോർഡിന്റെ മൗനം ആശങ്കാജനകമാണ്. നിയമപരമായ വ്യക്തിത്വമുള്ള ശബരിമലക്ഷേത്രത്തിലെ ആരാധനാമൂർത്തികൾക്കെതിരെ ഒരാൾ ഒരു ക്രിമിനൽ കുറ്റം ചെയ്യുമ്പോൾ ആ ക്ഷേത്രത്തിന്റെ നിയമപ്രാതിനിധ്യഅധികാരമുള്ള ബോർഡ് മൗനം പാലിക്കുന്നത് ശരിയല്ല.”
ഖേദപ്രകടനം എന്നത് മാപ്പപേക്ഷയല്ല. അത് കുറ്റാന്വേഷണത്തിനു തടസവുമല്ല. തന്ത്രപരവും യാന്ത്രികവുമായ ഖേദപ്രകടനം പരിഗണിക്കേണ്ടതുമല്ല എന്ന് നിയമവശംകൂടി അദ്ദേഹം ഓർമ്മിപ്പിക്കുന്നുണ്ട്.
