കോട്ടയം: പൊലീസ് കേസെടുത്തതോടെ അയ്യപ്പ സ്വാമിയെക്കുറിച്ചുള്ള നീചമായ പരാമര്‍ശത്തില്‍ ഖേദം പ്രകടിപ്പിച്ച് തടിയൂരാന്‍ സണ്ണി എം. കപിക്കാടിന്റെ പരിശ്രമം. ഉപയോഗിച്ച വാക്കില്‍ ജാഗ്രതക്കുറവ് ഉണ്ടായിട്ടുണ്ടെന്നും എന്നാല്‍ അഭിപ്രായങ്ങളിലോ വിമര്‍ശനങ്ങളിലോ ഒരു വിട്ടുവീഴ്ചയുമില്ലെന്നും അദ്ദേഹം പറഞ്ഞു. പ്രസംഗത്തിലെ ഒരു ഭാഗം അടര്‍ത്തിമാറ്റി വിവാദമാക്കുന്നത് ഹിന്ദുത്വവാദികളാണെന്നാണ് സണ്ണിയുടെ വാദം. മലയാളി സമൂഹത്തോട് തുറന്ന ഖേദം പ്രകടിപ്പിക്കുന്നുവെന്നും കേസിനെ നിയമപരമായി നേരിടുമെന്നും അദ്ദേഹം പറഞ്ഞു.
മലയാളം സര്‍വകലാശാലയിലെ പ്രതിഷേധസമ്മേളനത്തിലാണ് സണ്ണി കപിക്കാടിന്റെ വിവാദ പരാമര്‍ശങ്ങള്‍ ഉണ്ടായത്.
പറഞ്ഞത് തെറ്റായിപ്പോയെന്ന തോന്നലില്‍ നിന്നല്ല, പലവഴിക്കും കേസ് വരുമെന്ന് ബോധ്യമായതിനെത്തുടര്‍ന്നുള്ള തടിതപ്പലാണ് ധാര്‍ഷ്ട്യം വിടാതെയുള്ള ഔപചാരികമായ ഖേദപ്രകടനം. ബിജെപി അടക്കമുള്ള സംഘടനകള്‍ നല്‍കിയ പരാതികളില്‍ പൊലീസ് കേസെടുത്തതായാണ് വിവരം.
