ന്യൂദല്ഹി: കേന്ദ്ര വാണിജ്യ-വ്യവസായ മന്ത്രി പീയൂഷ് ഗോയലിന്റെ നേതൃത്വത്തില് ഭാരതത്തില് നിന്നുള്ള ഏറ്റവും വലിയ വ്യാപാരി പ്രതിനിധി സംഘം ഇന്ന് മുതല് 27 വരെ ജപ്പാന് സന്ദര്ശിക്കും. നിര്മാണമേഖല, സെമികണ്ടക്ടര്, ഹരിതോര്ജം, ഉരുക്ക് വ്യവസായം, വാഹന നിര്മാണം, ധനകാര്യ സേവനങ്ങള്, ആരോഗ്യ സംരക്ഷണം, സ്റ്റാര്ട്ടപ്പുകള് തുടങ്ങി വിവിധ മേഖലകളിലെ 200-ലധികം വ്യവസായ പ്രമുഖരുടെ സംഘം ടോക്കിയോ, നഗോയ, ഒസാക്ക എന്നീ നഗരങ്ങള് സന്ദര്ശിക്കും.
പ്രമുഖ ജാപ്പനീസ് വ്യവസായ ഗ്രൂപ്പുകളുടെ ഉന്നത നേതൃത്വവുമായി കേന്ദ്രമന്ത്രി ടോക്കിയോയില് ചര്ച്ചകള് നടത്തും. ഒപ്പം 1,500-ലധികം പ്രമുഖ ജാപ്പനീസ് കമ്പനികളുടെ പരമോന്നത സംഘടനയായ ‘കെയ്ദന്റെന്’ (ജപ്പാന് ബിസിനസ് ഫെഡറേഷന്) സംഘടിപ്പിക്കുന്ന വട്ടമേശ സമ്മേളനത്തിലും പീയൂഷ് ഗോയല് പങ്കെടുക്കും. ജപ്പാന് സാമ്പത്തിക വ്യാപാര വ്യവസായ മന്ത്രി അകസാവ റിയോസെയുമായി പീയൂഷ് ഗോയല് ഉഭയകക്ഷി ചര്ച്ച നടത്തും. കൂടാതെ ജാപ്പനീസ് ഗവണ്മെന്റിലെയും പാര്ലമെന്റിലെയും മുതിര്ന്ന അംഗങ്ങളുമായും ജപ്പാനിലെ ഭാരത സമൂഹവുമായും അദ്ദേഹം സംവദിക്കും.
മധ്യ ജപ്പാനിലെ പ്രധാന വ്യാവസായിക കേന്ദ്രമായ നഗോയയില്, ചുക്കെയ്റെന് (സെന്ട്രല് ജപ്പാന് എക്കണോമിക് ഫെഡറേഷന്), നഗോയ ചേംബര് ഓഫ് കൊമേഴ്സ് ആന്റ് ഇന്ഡസ്ട്രി എന്നിവരുമായി ചേര്ന്ന് സംഘടിപ്പിക്കുന്ന റോഡ്ഷോയ്ക്ക് കേന്ദ്രമന്ത്രി നേതൃത്വം നല്കും. ഐച്ചി പ്രിഫെക്ചര് ഭരണനേതൃത്വവുമായും വാഹനനിര്മാണ, ഉരുക്ക് മേഖലകളിലെ പ്രധാന നിര്മാണ നിക്ഷേപകരുമായും അദ്ദേഹം ആശയവിനിമയം നടത്തും.
ഇലക്ട്രോണിക്സ്, വ്യവസായം, ഉപഭോക്തൃ മേഖലകളിലെ പ്രമുഖ ജാപ്പനീസ് കമ്പനികളുമായി കൂടിക്കാഴ്ചകളും നിക്ഷേപക-വ്യാപാര റോഡ്ഷോയും ഉള്പ്പെടുത്തി ഒസാക്കയിലാണ് സന്ദര്ശനം സമാപിക്കുന്നത്. ഭാരതത്തിന്റെ നിര്മാണ, ഹരിതോര്ജ, ഉപഭോക്തൃ വിപണികളിലെ വിപുലമായ അവസരങ്ങള് പരിചയപ്പെടുത്തുകയാണ് ലക്ഷ്യം. വിവിധ മേഖലകളിലെ 200-ലധികം വ്യാപാരി പ്രതിനിധികളടങ്ങുന്ന സംഘത്തിന്റെ ചരിത്രപരമായ സന്ദര്ശനം ഉഭയകക്ഷി വ്യാപാര-നിക്ഷേപ ബന്ധങ്ങള്ക്ക് പുതിയ ഊര്ജം പകരുമെന്നാണ് പ്രതീക്ഷിക്കുന്നത്.
