ന്യൂദല്‍ഹി: ദേശീയ സുരക്ഷാ ഉപദേഷ്ടാവ് അജിത് ഡോവല്‍ ഇന്നും നാളെയും ചൈന സന്ദര്‍ശിക്കും. ചൈനീസ് വിദേശകാര്യമന്ത്രി വാങ് യീയുമായി അദ്ദേഹം നാളെ ഉഭയകക്ഷി ചര്‍ച്ച നടത്തും. അതിര്‍ത്തിയിലെ വിഷയങ്ങള്‍ ചര്‍ച്ചയില്‍ പ്രധാന വിഷയമാകുമെന്നാണ് കണക്കുകൂട്ടല്‍.
അരുണാചല്‍ പ്രദേശങ്ങളിലെ വിവിധ സ്ഥലങ്ങള്‍ക്ക് ചൈന പുതിയ പേരുകള്‍ നല്‍കിയതിനെതിരെ ഭാരതം രൂക്ഷവിമര്‍ശനം ഉന്നയിച്ചിരുന്നു. ഈയിടെ അരുണാചല്‍പ്രദേശിലെ 27 സ്ഥലങ്ങള്‍ ഭാരതം സര്‍വ്വെ ഓഫ് ഇന്ത്യ മാപ്പില്‍ ഉള്‍പ്പെടുത്തുകയും പുതിയ പേരുകള്‍ നല്‍കുകയും ചെയ്തിരുന്നു.
അതിര്‍ത്തിയിലെ സമാധാനം ഉഭയകക്ഷി ബന്ധങ്ങളുടെ സുഗമമായ മുന്നോട്ടുപോക്കിന് അനിവാര്യമാണെന്ന് ഇരുപക്ഷവും ആവര്‍ത്തിക്കുന്ന സാഹചര്യത്തില്‍ കൂടിക്കാഴ്ച നിര്‍ണായകമാണ്.
അതിര്‍ത്തിയിലെ പ്രശ്നങ്ങള്‍ സമഗ്രമായി പരിഹരിക്കുന്നതിനായാണ് പ്രത്യേക പ്രതിനിധികളുടെ ചര്‍ച്ചാസംവിധാനം രൂപീകരിച്ചത്. വിവിധ മേഖലകളില്‍ ഉണ്ടാകുന്ന കടുത്ത സംഘര്‍ഷങ്ങള്‍ ലഘൂകരിക്കാന്‍ ഈ സംവിധാനം ഉപയോഗപ്രദമാണെന്നാണ് വിലയിരുത്തല്‍.
സപ്തംബര്‍ 12, 13 തീയതികളില്‍ ദല്‍ഹിയില്‍ നടക്കുന്ന ബ്രിക്സ് ഉച്ചകോടിയില്‍ ചൈനീസ് പ്രസിഡന്റ് ഷി ജിന്‍പിങ് പങ്കെടുക്കുമെന്നാണ് പ്രതീക്ഷിക്കുന്നത്. ബ്രിക്സ് ഉച്ചകോടിക്ക് തൊട്ടുമുന്‍പ് കൂടിക്കാഴ്ച നടക്കുന്നു എന്നതും ശ്രദ്ധേയമാണ്. ഉച്ചകോടിയുടെ ഭാഗമായി പ്രധാനമന്ത്രി നരേന്ദ്ര മോദിയും ഷി ജിന്‍പിങ്ങും തമ്മില്‍ പ്രത്യേക കൂടിക്കാഴ്ച നടത്താനും സാധ്യതയുണ്ട്.
