തിരുവനന്തപുരം: പിണറായി വിജയന്റെ നഗരത്തിലെ വാടക വീട്ടില്‍ പരിശോധന കഴിഞ്ഞ മടങ്ങവെ ഇഡി ഉദ്യോഗസ്ഥരെ ആക്രമിച്ച കേസിലെ പ്രതികള്‍ പൊലീസ് സ്റ്റേഷനിലെത്തി ഓണം ആഘോഷിച്ച സംഭവത്തില്‍ കടുത്ത നിയമനടപടിക്ക് പൊലീസ്.പ്രതികളുടെ ജാമ്യം റദ്ദാക്കാന്‍ നടപടി തുടങ്ങി.
പാളയം ലോക്കല്‍ സെക്രട്ടറി ഐ പി ബിനു ഉള്‍പ്പെടെയുള്ള പ്രതികളാണ് പൊലീസ് സ്റ്റേഷനില്‍ ഓണാഘോഷത്തിന്റെ ഭാഗമായത്. പ്രതികള്‍ ചെണ്ടകൊട്ടുകയും പൊലീസ് സ്റ്റേഷനിലെ ഓണാഘോഷ ദൃശ്യങ്ങള്‍ റീല്‍സാക്കി സാമൂഹിക മാധ്യമങ്ങളിലും പോസ്റ്റ് ചെയ്തു.
പ്രതികളില്‍ ചിലര്‍ ധരിച്ചിരുന്നത് പൊലീസ് ഉദ്യോഗസ്ഥര്‍ ധരിച്ചിരുന്ന അതേ നിറത്തിലുള്ള വസ്ത്രമാണ്. ദൃശ്യങ്ങള്‍ സമൂഹമാധ്യമങ്ങളില്‍ പ്രചരിച്ചതോടെ ഉദ്യോഗസ്ഥര്‍ ഊഞ്ഞാല്‍ അഴിച്ചുമാറ്റി. ക്രമസമാധാന ചുമതലയുള്ള എഡിജിപി പി വിജയന്‍ സംഭവത്തില്‍ സിറ്റി പൊലീസ് കമ്മീഷണറോട് റിപ്പോര്‍ട്ട് തേടി.സ്‌പെഷ്യല്‍ ബ്രാഞ്ച് അസിസ്റ്റന്റ് കമ്മീഷണര്‍ അന്വേഷിച്ച് സിറ്റി പൊലീസ് കമ്മീഷണര്‍ക്ക് റിപ്പോര്‍ട്ട് നല്‍കി.പ്രതികള്‍ക്ക് പൊലീസ് ഒത്താശ ലഭിച്ചിരിക്കാം എന്നാണ് റിപ്പോര്‍ട്ട്.
ജാമ്യവ്യവസ്ഥയുടെ ഭാഗമായി പൊലീസ് സ്റ്റേഷനില്‍ ഒപ്പിടാന്‍ എത്തിയതാണ് പ്രതികള്‍. പൊലീസ് സ്റ്റേഷനില്‍ ഓണാഘോഷം നടക്കുമ്പോഴാണ് പ്രതികള്‍ രാവിലെ 10.20ഓടെ എത്തിയതെന്നാണ് വിവരം. ഈ സമയം എസ് എച്ച് ഒ പ്രശാന്ത് സ്ഥലത്തുണ്ടായിരുന്നില്ല.തുടര്‍ന്ന് പ്രതികള്‍ ഊഞ്ഞാലാടുകയും ഉദ്യോഗസ്ഥരുമായി ചിരികളികളുമായി ആഘോഷത്തിന്റെ ഭാഗമാകുകയുമായിരുന്നു. 10.45 ഓടെ പ്രതികള്‍ ഒപ്പിട്ടു. ഇതിനിടെയാണ് ആഘോഷം നടത്തിയത്. പ്രതികളെ ആഘോഷത്തിന് ക്ഷണിച്ചിട്ടില്ലെന്നും പൊലീസുകാര്‍ അറിയിച്ചെന്നാണ് അറിയുന്നത്.
ഇ ഡി ഉദ്യോഗസ്ഥരെ ആക്രമിച്ച കേസില്‍ ദിവസങ്ങള്‍ക്കു മുന്‍പാണ് പ്രതികള്‍ക്ക് ജാമ്യം ലഭിച്ചത്.
