കൊച്ചി: കൊച്ചി ശാസ്ത്ര സാങ്കേതിക സര്വകലാശാലയിലെ (കുസാറ്റ്) ഗവേഷകര്, അര്ബുദ പ്രതിരോധ ശേഷിയുള്ള സെല്ഫ്- അസംബിള്ഡ് മെറ്റല്-ഓര്ഗാനിക് ത്രികോണ സംയുക്തം വികസിപ്പിച്ചെടുത്തു. സ്തനാര്ബുദത്തെ ചെറുക്കുന്നതിനായി ഉയര്ന്ന ജൈവ-പ്രവര്ത്തന ശേഷിയുള്ള ഒരു സംയുക്തം രൂപകല്പന ചെയ്ത് നിര്മിക്കുന്നതുമായി ബന്ധപ്പെട്ടതാണ് ഈ കണ്ടുപിടിത്തം. കുസാറ്റ് അപ്ലൈഡ് കെമിസ്ട്രി വകുപ്പ് അസോ. പ്രൊഫ. ഡോ. മനോജ് ഇ, ഗവേഷകയായ അന്സ സന്തു എന്നിവര് നടത്തിയ ഗവേഷണ പ്രവര്ത്തനത്തിനാണ് ഇന്ത്യന് പേറ്റന്റ് ലഭിച്ചത്.
പുതുതായി രൂപകല്പന ചെയ്ത തയോസെമികാര്ബസോണ് തന്മാത്രകള് ഉപയോഗിച്ച് ബന്ധിപ്പിച്ചിരിക്കുന്ന മൂന്ന് സിങ്ക് അയോണുകള് ചേര്ന്നതാണ് ഈ സവിശേഷ സംയുക്തം; ഇത് ഒരു മെറ്റലോ-സുപ്രാമോളിക്യുലാര് ഘടനയാണ് സൃഷ്ടിക്കുന്നത്. സിംഗിള്-ക്രിസ്റ്റല് എക്സ്-റേ ഡിഫ്രാക്ഷന് രീതി ഉപയോഗിച്ച് ഈ സംയുക്തത്തിന്റെ ഘടന കൃത്യമായി സ്ഥിരീകരിച്ചിട്ടുണ്ട്. മാരകമായ എംസിഎഫ് 7 സ്തനാര്ബുദ കോശങ്ങള്ക്കെതിരെയുള്ള ഇതിന്റെ സൈറ്റോടോക്സിസിറ്റി (കോശങ്ങളെ നശിപ്പിക്കാനുള്ള കഴിവ്) നിലവിലുള്ള പ്രധാന മരുന്നായ സിസ്പ്ലാറ്റിനേക്കാള് ഏകദേശം 3.5 മടങ്ങ് മികച്ചതാണെന്ന് കണ്ടെത്തി.
കോശങ്ങളുടെ സ്വാഭാവിക മരണം എന്ന പ്രക്രിയയിലൂടെ കാന്സര് കോശങ്ങളെ നശിപ്പിക്കാന് ഈ സംയുക്തത്തിന് കഴിയുമെന്ന് പഠനങ്ങള് സൂചിപ്പിക്കുന്നു. ഡിഎന്എയുമായുള്ള ബന്ധം, റിയാക്ടീവ് ഓക്സിജന് സ്പീഷീസുകളുടെ ഉത്പാദനം, പ്രോട്ടീന് ബന്ധനം, ന്യൂക്ലിയര് സ്റ്റെയിനിംഗ് പരിശോധന എന്നിവയുള്പ്പെടെയുള്ള കൂടുതല് പരീക്ഷണ പഠനങ്ങളും ഇതിന്റെ മികച്ച പ്രവര്ത്തനക്ഷമതയെ സാധൂകരിക്കുന്നു. കാന്സര് പ്രതിരോധ ഗവേഷണത്തില് പുതിയ മരുന്ന് കണ്ടെത്തുന്നതില് ‘സുപ്രാമോളിക്യുലാര് കോഓര്ഡിനേഷന് കെമിസ്ട്രി’, ‘മെറ്റല്-ബേസ്ഡ് ഫ്രെയിംവര്ക്ക് സംയുക്തങ്ങള്’ എന്നിവയ്ക്കുള്ള വലിയ സാധ്യതകളെ ഈ പഠനം എടുത്തുകാണിക്കുന്നു. ബാക്ടീരിയയെ നശിപ്പിക്കാനുള്ള മറ്റ് കഴിവുകള് ഉള്പ്പെടെയുള്ള പ്രധാന കണ്ടെത്തലുകള്, അന്താരാഷ്ട്രതലത്തില് പ്രശസ്തമായ റോയല് സൊസൈറ്റി ഓഫ് കെമിസ്ട്രിയുടെ ‘ജേണല് ഓഫ് മെറ്റീരിയല്സ് കെമിസ്ട്രി ബി’ എന്ന ജേണലിലും പ്രസിദ്ധീകരിച്ചിട്ടുണ്ട്.
