ന്യൂദല്ഹി: ഖരമാലിന്യങ്ങള് വേര്തിരിക്കുന്നതിലും സംഭരിക്കുന്നതിലും ശരിയായി കൈമാറുന്നതിലും പരാജയപ്പെട്ടാല് ജല-വൈദ്യുത വിതരണം താല്ക്കാലികമായി വിച്ഛേദിക്കുമെന്ന് അധിക തോതില് മാലിന്യം ഉല്പ്പാദിപ്പിക്കുന്നവരെ രേഖാമൂലം അറിയിക്കണമെന്ന് സുപ്രീം കോടതി തദ്ദേശ സ്വയംഭരണ സ്ഥാപനങ്ങളോട് നിര്ദ്ദേശിച്ചു.
സ്കൂള് പാഠ്യപദ്ധതിയില് ഖരമാലിന്യ സംസ്കരണത്തെക്കുറിച്ച് തിയറി, പ്രാക്ടിക്കല് പാഠങ്ങള് ഉടന് ഉള്പ്പെടുത്തണമെന്ന് കോടതി സ്കൂള്, ഉന്നത വിദ്യാഭ്യാസ വകുപ്പുകള്ക്കും നിര്ദേശം നല്കി. മാലിന്യ സംസ്കരണം കുടുംബാംഗങ്ങളെ പഠിപ്പിക്കാന് വിദ്യാര്ത്ഥികള്ക്ക് പരിശീലനം നല്കണം. അധ്യാപകര്ക്ക് പരിശീലകരാകാനുള്ള പരിശീലനവും നല്കണം. പരിശീലനം ലഭിച്ച വിദ്യാര്ത്ഥികള് ‘ഗാര്ഹിക തല സൂപ്പര്വൈസര്മാരാ’യി പ്രവര്ത്തിക്കുമെന്നും കോടതി പറഞ്ഞു.
