കൊച്ചി: ശബരിമല ക്ഷേത്രത്തില് വിതരണം ചെയ്യുന്ന അപ്പം,അരവണ അടക്കമുള്ള നിവേദ്യങ്ങളുടെ ഗുണനിലവാര പരിശോധനകള്ക്കായി പമ്പയില് ഒരു സമ്പൂര്ണ്ണ ലബോറട്ടറി സ്ഥാപിക്കേണ്ട സമയം അതിക്രമിച്ചുവെന്ന് ഹൈക്കോടതി. അതുവഴി ആവശ്യമായ പരിശോധനകള് കാലതാമസമില്ലാതെ നടത്താന് കഴിയും. ഭക്ഷ്യ സുരക്ഷാ മാനദണ്ഡങ്ങള് കര്ശനമായി പാലിക്കുന്നുണ്ടെന്ന് ഉറപ്പാക്കാനുമാകുമെന്ന് കോടതി നിരീക്ഷിച്ചു.
നിലവിലുള്ള ഭക്ഷ്യ പരിശോധനാ ലാബ് ഇത്തരം ഭക്ഷ്യവസ്തുക്കളുടെ വിശദമായ പരിശോധയ്ക്ക് സജ്ജമല്ലെന്ന് ജസ്റ്റിസ് രാജാ വിജയരാഘവന് വി , ജസ്റ്റിസ് കെ വി ജയകുമാര് എന്നിവരടങ്ങിയ ഡിവിഷന് ബെഞ്ച് ചൂണ്ടിക്കാട്ടി.
നിവേദ്യങ്ങള് അടക്കമുള്ള ഭക്ഷ്യവസ്തുക്കളുടെ സാമ്പിളുകള് പരിശോധനയ്ക്കായി പത്തനംതിട്ടയിലോ തിരുവനന്തപുരത്തോ കൊണ്ടുപോകേണ്ട അവസ്ഥയാണ്. ഗുണനിലവാര നിയന്ത്രണം വേഗത്തില് ഉറപ്പാക്കാന് ഈ ക്രമീകരണം പര്യാപ്തമല്ലെന്ന് കോടതി പറഞ്ഞു.
