തിരുവനന്തപുരം: കേരളത്തിലെ ഉദ്യോഗാര്ത്ഥികളെ വഞ്ചിച്ച, അഴിമതിയാരോപണങ്ങള്ക്ക് വിധേയരായ ഭരണസമിതി അംഗങ്ങളെ ഉള്പ്പെടുത്തി നിലവിലുള്ള പി എസ് സി ഭരണസമിതി തുടരുന്നിടത്തോളം യുവമോര്ച്ച ശക്തമായ സമരവുമായി മുന്നോട്ട് പോകുമെന്ന് യുവമോര്ച്ച സംസ്ഥാന അധ്യക്ഷന് വി. മനുപ്രസാദ് .പി എസ് സി വിഷയത്തില് യുവമോര്ച്ച നല്കിയ പരാതിയില് കേരള ഗവര്ണര് നടപടി സ്വീകരിക്കുകയും വിഷയം ഗൗരവമായി പരിഗണിക്കുമെന്ന് ഉറപ്പ് നല്കുകയും ചെയ്തിട്ടുണ്ട്. പി എസ് സി വിഷയത്തില് ഗവര്ണറുടെ ഇടപെടല് ഉണ്ടാകുമെന്നത് പ്രതീക്ഷ നല്കുന്നതാണെന്നും വി. മനുപ്രസാദ് പറഞ്ഞു.
കേരളത്തിലെ സര്ക്കാര് ഒഴിവുകള് പൂര്ണമായി റിപ്പോര്ട്ട് ചെയ്ത് ധവളപത്രം പ്രസിദ്ധീകരിക്കുക, റിപ്പോര്ട്ട് ചെയ്ത ഒഴിവുകളില് നിലവിലുള്ള റാങ്ക് ലിസ്റ്റുകളില് നിന്ന് അടിയന്തരമായി നിയമനം നടത്തുക, കഴിഞ്ഞ പത്ത് വര്ഷത്തെ പി എസ് സി നിയമനങ്ങള് സി ബി ഐ അന്വേഷിക്കുക, പി എസ് സി അംഗങ്ങളുടെ നിയമനത്തിന് സുതാര്യമായ ചട്ടങ്ങള് രൂപീകരിക്കുക തുടങ്ങിയ ആവശ്യങ്ങള് ഉന്നയിച്ചാണ് യുവമോര്ച്ച സമരം നടത്തുന്നത്.
ഇടത്-വലത് മുന്നണികളുടെ യുവജന വഞ്ചനയ്ക്കെതിരെ യുവമോര്ച്ചയുടെ നേതൃത്വത്തില് ആഗസ്റ്റ് 19, 20 തീയതികളില് പി എസ് സി ആസ്ഥാനത്തിന് മുന്നില് രാപ്പകല് സമരം സംഘടിപ്പിക്കുമെന്നും മനുപ്രസാദ് അറിയിച്ചു.
