പൂവാര്: കേരളത്തിലെ മറ്റ് ബീച്ചുകളിലൊന്നും കാണാത്ത അസാധാരണ നടപടിയുമായി അടിമലത്തുറയില് വിനോദസഞ്ചാരികളില് നിന്ന് ഇടവകയുടെ ടോള് പിരിവ്. കടല് കാണാനെത്തുന്ന വാഹനങ്ങളെ തടഞ്ഞുനിര്ത്തിയാണ് പ്രാദേശിക ഇടവകയുടെ നേതൃത്വത്തില് അനധികൃതമായി പണം പിരിക്കുന്നത്. പൊതുനിരത്തിലൂടെ ബീച്ചിലേക്ക് പ്രവേശിക്കുന്ന കാറുകള്, ബൈക്കുകള് ഉള്പ്പെടെയുള്ള വാഹനങ്ങള്ക്ക് പ്രത്യേക രസീത് നല്കിയാണ് പിരിവ്. സര്ക്കാരിനോ തദ്ദേശസ്വയംഭരണ സ്ഥാപനങ്ങള്ക്കോ യാതൊരു പങ്കുമില്ലാത്ത ഈ പിരിവിനെതിരെ നാട്ടുകാരും സഞ്ചാരികളും പ്രതിഷേധത്തിലാണ്. സര്ക്കാര് അംഗീകാരമില്ലാതെ പൊതുറോഡില് കയര്കെട്ടി അടച്ചാണ് പണപ്പിരിവ്.
ബൈക്കുകള്ക്ക് 10 രൂപയും കാറുകള്ക്ക് 30 രൂപ വരെയുമാണ് ഇടവക അധികൃതര് സഞ്ചാരികളില് നിന്ന് ഈടാക്കുന്നത്. കോട്ടുകാല് പഞ്ചായത്ത് പരിധിയിലുള്ള പ്രദേശത്താണ് ഈ അനധികൃത പിരിവ് നടക്കുന്നത്. വിഷയം ശ്രദ്ധയില്പ്പെട്ടിട്ടും അധികൃതര് നടപടിയെടുക്കാതെ കണ്ണടയ്ക്കുകയാണെന്ന് പരാതിയുണ്ട്. തീരദേശ റോഡുകളും ബീച്ചുകളും പൊതുസ്വത്തായിരിക്കെ, ഒരു മതസ്ഥാപനം സ്വന്തം നിലയില് പ്രവേശന ഫീസ് പിരിക്കുന്നത് അനീതിയാണെന്ന് വിനോദസഞ്ചാരികള് ചൂണ്ടിക്കാട്ടുന്നു. പൂവാര്, കോവളം, വര്ക്കല, ആലപ്പുഴ, കോഴിക്കോട് തുടങ്ങിയ കേരളത്തിലെ പ്രധാന പൊതു ബീച്ചുകളില് പൊതുജനങ്ങള്ക്ക് സന്ദര്ശനം സൗജന്യമെന്നിരിക്കെയാണ് അടിമലത്തുറയില് ഇടവക പണപ്പിരിവ് നടത്തുന്നത്. കടല്ത്തീരത്ത് സന്ധ്യാസമയം ആസ്വാദിക്കാനെത്തുന്നവര് ഇതിന്റെ പരിസര പ്രദേശത്ത് എവിടെ വാഹനം പാര്ക്ക് ചെയ്താലും കാശ് കൊടുക്കേണ്ട ഗതികേടിലാണ്. ബീച്ചില് ഡ്യൂട്ടിക്കെത്തുന്ന പോലീസും മാസങ്ങളായി തുടങ്ങിയ നിയമവിരുദ്ധ പണപ്പിരിവിന് കൂട്ടുനില്ക്കുന്ന സ്ഥിതി വിശേഷമാണ്. ചോദ്യം ചെയ്യുന്നവരോട് മോശമായി പെരുമാറുന്നതായും പരാതിയുണ്ട്. ജില്ലാ ഭരണകൂടവും പോലീസും അടിയന്തരമായി ഇടപെട്ട് ഈ നിയമവിരുദ്ധ പിരിവ് അവസാനിപ്പിക്കണമെന്ന ആവശ്യം ശക്തമാകുകയാണ്.
ജന്മഭൂമി ഓണ്ലൈന്