മുംബൈ: ഗോസ്റ്റ്, ദ ഫൈനല് എക്സിറ്റ് തുടങ്ങി ഒരു പിടി ഹിന്ദി സിനിമകളില് അഭിനയിച്ച അനന്യ രാജ് അന്തരിച്ചു. പക്ഷെ വീട്ടുകാര് ഇവരുടെ മരണവാര്ത്ത പുറത്തുവിട്ടത് ഒരു മാസത്തിന് ശേഷമാണെന്നത് വേദനയുളവാക്കുന്നു.
കുടുംബം അനന്യയുടെ ഇന്സ്റ്റഗ്രാം പേജിലൂടെയാണ് മരണവാര്ത്ത പുറത്തുവിട്ടത്. ജൂലായ് 15ന് അനന്യ രാജ് മരിച്ചുവെന്നാണ് കുടുംബം അറിയിച്ചത്. “ഇത് അനന്യയുടെ കുടുംബമാണ്. ജൂലായ് 15ന് അനന്യ അന്തരിച്ചു. സമാധാനത്തോടെ ഉറക്കത്തിലായിരുന്നു അവളുടെ മരണം. കടുത്ത രോഗബാധയിലൂടെ കടന്നുപോയ അനന്യ ശാരീരികമായി മാത്രമല്ല, മാനസികമായും കടുത്ത അസ്വാസ്ഥ്യങ്ങള് അനുഭവിച്ചിരുന്നു. അതിന് മറികടക്കാന് അവള് കഠിനമായി പരിശ്രമിച്ചിരുന്നു.”- അനന്യയുടെ കുടുംബം പങ്കുവെച്ച പോസ്റ്റില് പറയുന്നു.
മ്യൂസിക് ആല്ബത്തിലൂടെ അഭിനയരംഗത്തേക്ക് കടന്ന അനന്യയുടെ ആദ്യ സിനിമ 2016ല് നിര്മ്മിച്ച 7 ഹവേഴ്സ് ടു ഗോ ആയിരുന്നു. 2019ലെ ഗോസ്റ്റ് എന്ന സിനിമയായിരുന്നു അവസാനത്തെ സിനിമ. തെലുഗു സിനിമയിലും അഭിനയിച്ചിരുന്നു.
