കോഴിക്കോട് : കുതിരവട്ടം മാനസികാരോഗ്യ കേന്ദ്രത്തില് സന്ദര്ശനം നടത്തി ഹൈക്കോടതി ജസ്റ്റിസുമാരായ ദേവന് രാമചന്ദ്രനും, ബസന്ത് ബാലാജിയും.ഇവിടെ ആവശ്യത്തിന് ജീവനക്കാരോ അടിസ്ഥാന സൗകര്യങ്ങളോ ഇല്ലെന്ന റിപ്പോര്ട്ടുകള് വന്നിരുന്നു.
രോഗികളുടെയും ജീവനക്കാരുടെയും അവകാശ സംരക്ഷണം, ആശുപത്രിയിലെ അടിസ്ഥാന സൗകര്യങ്ങള്, ഡോക്ടര്മാരുടെയും ജീവനക്കാരുടെയും കുറവ് തുടങ്ങിയവയാണ് പരിശോധിച്ചത്. സെല്ലുകളിലെ പോരായ്മ, ആശുപത്രി ഉപകരണങ്ങളുടെ പഴക്കം എന്നിവയെ കുറിച്ചും ചോദിച്ചു മനസിലാക്കി.ജില്ലാകളക്ടര്, സിറ്റി പൊലീസ് കമ്മീഷണര്, ആരോഗ്യ വിഭാഗം ഉദ്യോഗസ്ഥര് എന്നിവരുമായി ചര്ച്ച നടത്തി.
സംസ്ഥാനത്തെ മാനസിക ആരോഗ്യ കേന്ദ്രങ്ങളില് ഏറ്റവും വലിയ മനുഷ്യാവകാശ ലംഘനമാണ് നടക്കുന്നത് എന്ന് കഴിഞ്ഞ ജൂലായില് ഹൈക്കോടതി ഡിവിഷന് ബെഞ്ച് പറഞ്ഞിരുന്നു. ഇതിന് പിന്നാലെയാണ് പേരൂര്ക്കട, തൃശൂര്, കുതിരവട്ടം എന്നിവിടങ്ങളില് ജഡ്ജിമാര് സന്ദര്ശനം നടത്തിയത്.
