കൊച്ചി: കാലടി സംസ്കൃത സര്വകലാശാലയില് നടന്ന പ്രതിഷേധത്തിനിടെ കയ്യേറ്റം ചെയ്തെന്ന വി സി ഡോ സിസ തോമസിന്റെ പരാതിയില് നാല് എസ്എഫ്ഐ പ്രവര്ത്തകര് കസ്റ്റഡിയില്. മെവിന്, യദുകൃഷ്ണന്, ബേസില്, വിജീഷ് എന്നിവരെയാണ് പൊലീസ് കസ്റ്റഡിയിലെടുത്തത്.
പൊലീസിന്റെ കൃത്യനിര്വഹണം തടസപ്പെടുത്തി എന്ന കേസും എസ്എഫ്ഐ പ്രവര്ത്തകര്ക്കെതിരെ ഉണ്ട്. രണ്ട് കേസുകളിലുമായാണ് നാല് വിദ്യാര്ഥികളെ കസ്റ്റഡിയിലെടുത്തത്.
കാലടി സംസ്കൃത സര്വകലാശാലയിലെ ഒരു സംഘം വിദ്യാര്ത്ഥികള് ദേഹോപദ്രവം ഏല്പ്പിച്ചുവെന്നും കൈയേറ്റം ചെയ്തുവെന്നും മാനസികമായി പീഡിപ്പിച്ചെന്നും കാട്ടി വൈസ് ചാന്സലര് സിസ തോമസ് മുഖ്യമന്ത്രിക്കും ആഭ്യന്തര മന്ത്രിക്കും പുറമെ, ഉന്നത വിദ്യാഭ്യാസ മന്ത്രി, ഡിജിപി, ഉന്നത വിദ്യാഭ്യാസ സെക്രട്ടറി എന്നിവര്ക്കും പരാതി നല്കിയിരുന്നു. ഔദ്യോഗിക കൃത്യ നിര്വഹണം തടസപ്പെടുത്തിയെന്നും ഔദ്യോഗിക വാഹനത്തിന് കേട് വരുത്തിയെന്നും തന്നോടൊപ്പം ഉണ്ടായിരുന്ന സിന്ഡിക്കേറ്റ് അംഗങ്ങളും പേഴ്സണല് സ്റ്റാഫും ആക്രമിക്കപ്പെട്ടുവെന്നും പരാതിയില് ഉണ്ട്.
പൊലീസ് സാന്നിധ്യം ഉണ്ടായിരുന്നെങ്കിലും തന്നെയും സിന്ഡിക്കേറ്റ് അംഗങ്ങളെയും സംരക്ഷിക്കുന്നതിന് മുന് കരുതലുകള് പൊലീസിന്റെ ഭാഗത്തുണ്ടായില്ലെന്ന് വിസി ഗവര്ണറെ അറിയിച്ചു. ഗവര്ണറെ സന്ദര്ശിച്ച ശേഷമാണ് വിസി പരാതി നല്കിയത്. സര്വകലാശാലയിലെ വിദ്യാര്ഥികളെ കൂടാതെ പുറമേ നിന്നുള്ള വിദ്യാര്ഥികളും ആക്രമിച്ചവരില് ഉണ്ടെന്നും വിസി പരാതിയില് പറയുന്നു. സാങ്കേതിക സര്വകലാശാല വിസിയായ സിസ തോമസ്, കാലടി സര്വകാലാശാലയുടെ വിസിയുടെ അധിക ചുമതലയും താല്ക്കാലികമായി വഹിക്കുന്നുണ്ട്.
അടിസ്ഥാന സൗകര്യങ്ങള് ഒരുക്കുക, ഗസ്റ്റ് അധ്യാപക നിയമനം ഉടന് നടത്തുക, വിദ്യാര്ഥികളുടെ സര്ട്ടിഫിക്കറ്റ് വിതരണം പൂര്ത്തിയാക്കുക തുടങ്ങി വിവിധ ആവശ്യങ്ങള് ഉന്നയിച്ചാണ് കാലടി ശ്രീ ശങ്കരാചാര്യ സര്വകലാശാലയില് എസ്എഫ്ഐ സമരം നടത്തിയത്. 25 ദിവസമായി തുടരുന്ന സമരത്തിനിടെ, സിന്ഡിക്കേറ്റ് യോഗത്തിന് എത്തിയ താത്കാലിക വി സി സിസ തോമസിനെതിരെയും വിദ്യാര്ഥികള് പ്രതിഷേധം നടത്തിയിരുന്നു. എസ്എഫ്ഐ പ്രവര്ത്തകര് വി സിക്ക് ശവമഞ്ചം ഒരുക്കിയുളള പ്രതിഷേധവും നടത്തിയത് വിവാദമായിരുന്നു.
