തിരുവനന്തപുരം: ശ്രീശങ്കരാചാര്യ സംസ്കൃത സര്വകലാശാല വിസി ഡോ. സിസ തോമസിന് നേരെയുണ്ടായ ശാരീരിക അധിക്ഷേപത്തിലും കൈയേറ്റ ശ്രമങ്ങളിലും ശക്തമായ പ്രതിഷേധവുമായി കേരളത്തിലെ വിവിധ സര്വകലാശാലകളിലെ വൈസ് ചാന്സലര്മാര്. സംഭവത്തില് ഉള്പ്പെട്ടവര്ക്കെതിരെ കര്ശന നിയമനടപടി സ്വീകരിക്കണമെന്ന് സര്ക്കാരിനോടും ചാന്സലറോടും വൈസ് ചാന്സലര്മാര് സംയുക്ത പ്രസ്താവനയിലൂടെ ആവശ്യപ്പെട്ടു.
വിദ്യാര്ത്ഥികളെന്ന വ്യാജേനയെത്തിയ സംഘം വിസി ഡോ. സിസ തോമസ്, സിന്ഡിക്കേറ്റ് അംഗങ്ങള്, മറ്റ് അദ്ധ്യാപകര് എന്നിവരെ ഓഫീസിനുള്ളില് മണിക്കൂറുകളോളം തടഞ്ഞുവെക്കുകയും മാനസികമായി പീഡിപ്പിക്കുകയും ചെയ്തു. പോലീസിന്റെ സാന്നിധ്യത്തിലും കേസ് എടുത്തില്ല. സ്ഥലത്തുണ്ടായിരുന്ന പോലീസ് സംഘം വിസിയുടെയും മറ്റുള്ളവരുടെയും ജീവന് സംരക്ഷിക്കാന് ശ്രമിച്ചെങ്കിലും, ഗുരുതരമായ കുറ്റം ചെയ്ത പ്രതികള്ക്കെതിരെ ക്രിമിനല് കേസ് രജിസ്റ്റര് ചെയ്തിട്ടില്ലെന്നത് ഏറെ ആശങ്കാജനകമാണെന്ന് വിസിമാര് ചൂണ്ടിക്കാട്ടി.
പ്രതികളില് ഭൂരിഭാഗവും പുറത്തുനിന്നുള്ളവരാണ്. ഒരു രാഷ്ട്രീയ പ്രസ്ഥാനത്തിന്റെ പ്രവര്ത്തകര് എന്ന് അവകാശപ്പെട്ടെത്തിയ ഇവരില് ഭൂരിഭാഗം പേരും സര്വകലാശാലയിലെ വിദ്യാര്ത്ഥികളല്ല. ലഭ്യമായ വീഡിയോ ഫൂട്ടേജുകളില് നിന്ന് ഇവരെ എളുപ്പത്തില് തിരിച്ചറിയാന് സാധിക്കും. സംഭവം സാംസ്കാരിക കേരളത്തിന് അപമാനമാണ്.
വിസിയുടെ പ്രതീകാത്മക ശവദാഹം നടത്തുന്ന ദൃശ്യങ്ങള് സോഷ്യല് മീഡിയയില് പ്രചരിപ്പിച്ചത് അക്കാദമിക് സമൂഹത്തില് വലിയ ഭീതിയുണ്ടാക്കിയിട്ടുണ്ട്. ഇത്തരം പ്രവര്ത്തികള് കേരളത്തിന്റെ ഉയര്ന്ന സാംസ്കാരിക ബോധത്തിനും പ്രശസ്തിക്കും വലിയ മങ്ങലേല്പ്പിക്കുന്നതാണ്. തുടര്ന്നും ഇത്തരം അക്രമസംഭവങ്ങള് ആവര്ത്തിക്കാതിരിക്കാന് കുറ്റക്കാര്ക്കെതിരെ അടിയന്തരമായും ദാക്ഷിണ്യമില്ലാതെയും മാതൃകാപരമായ ശിക്ഷാനടപടികള് സ്വീകരിക്കണമെന്ന് വിസിമാരായ ഡോ. മോഹനന് കുന്നുമ്മല് (ആരോഗ്യ സര്വകലാശാല), ഡോ. പി. രവീന്ദ്രന് (കാലിക്കറ്റ് യൂണിവേഴ്സിറ്റി), ഡോ. സജി ഗോപിനാഥ് (കണ്ണൂര് യൂണിവേഴ്സിറ്റി), ഡോ. ഡി. മാവൂത്ത് (എംജി യൂണിവേഴ്സിറ്റി), ഡോ. ബിജു കുമാര് (കേരള ഫിഷറീസ് സമുദ്രപഠന സര്വകലാശാല), ഡോ. ജഗതി രാജ് (ശ്രീനാരായണഗുരു ഓപ്പണ് സര്വകലാശാല), ഡോ. സജി ഗോപിനാഥ് (ഡിജിറ്റല് സര്വകലാശാല), ഡോ. എല്. സുഷമ (തുഞ്ചത്തെഴുത്തച്ഛന് മലയാളം സര്വകലാശാല), ഡോ. കെ. എ. സക്കറിയ (കൊച്ചി ശാസ്ത്ര സാങ്കേതിക സര്വകലാശാല), ഡോ. അനില് കുമാര് (കേരള വെറ്റിറിനറി ആന്ഡ് അനിമല് സയന്സ്), ഡോ. ബി. സജിതാ റാണി (കേരള കാര്ഷിക സര്വകലാശാല) എന്നിവര് സംയുക്ത പ്രസ്താവനയില് പറഞ്ഞു.
