ന്യൂദല്‍ഹി: വിദേശ നയതന്ത്രത്തെ വിമര്‍ശിക്കുന്നതിന്റെ മറവില്‍ പ്രധാനമന്ത്രി നരേന്ദ്ര മോദിയെയും ഇറ്റാലിയന്‍ പ്രധാനമന്ത്രി ജോര്‍ജിയ മെലോണിയെയും അപമാനിച്ച പ്രതിപക്ഷനേതാവ് രാഹുല്‍ ഗാന്ധിക്കെതിരെ രൂക്ഷവിമര്‍ശനം ഉയരുന്നു. വ്യാഴാഴ്ച നടന്ന രചനാത്മക് കോണ്‍ഗ്രസ് ദേശീയ കണ്‍വെന്‍ഷനില്‍ സംസാരിക്കവെയാണ് പ്രധാനമന്ത്രിയുടെ വിദേശനയം കൈകാര്യം ചെയ്യുന്ന രീതിയെ പരിഹസിക്കാനെന്ന വ്യാജേന മെലോണിയെ രാഹുല്‍ അപമാനിച്ചത്.
വിദേശ രാജ്യത്തലവന്മാരെ ആലിംഗനം ചെയ്ത് സ്നേഹം പങ്കുവയ്‌ക്കുന്നതിനെ ആക്ഷേപിച്ചുകൊണ്ടായിരുന്നു പ്രധാനമന്ത്രിയെയും മെലോണിയെയും രാഹുല്‍ അപമാനിച്ചത്. പ്രധാനമന്ത്രിയുടെ വിദേശ നയം അമിത ആലിംഗനമാണെന്ന് പറഞ്ഞ് കോണ്‍ഗ്രസ് നേതാവ് സന്ദീപ് ദീക്ഷിതിനെ വേദിയിലേക്ക് വിളിച്ച് ആലിംഗനം ചെയ്തു. പിന്നാലെ മെലോണിയെന്ന് വിചാരിച്ചാണോ തന്നെ ആലിംഗനം ചെയ്തതെന്ന് സന്ദീപ് ദീക്ഷിത് ചോദിച്ചു. താന്‍ ഇതുവരെ ആ തരത്തില്‍ എത്തിയിട്ടില്ലെന്നായിരുന്നു രാഹുലിന്റ മറുപടി.
രാഹുലിന്റെ പരാമര്‍ശത്തിനെതിരെ രൂക്ഷമായ വിമര്‍ശനം ഉയര്‍ന്നിട്ടുണ്ട്. പ്രതിപക്ഷ നേതാവിന്റെ അന്തസിന് നിരക്കാത്ത ഭാഷയാണ് രാഹുല്‍ പ്രയോഗിച്ചതെന്ന് ബിജെപി എംപി ബാന്‍സുരി സ്വരാജ് വിമര്‍ശിച്ചു.
രാഹുല്‍ ഗാന്ധി എപ്പോഴാണ് വലുതാകുകയെന്നും ഭാരതത്തെ നയിക്കാന്‍ വേണ്ടത് അമച്വര്‍ നാടകങ്ങളല്ല, പക്വതയുള്ള നേതൃത്വമാണെന്നും കേന്ദ്ര വിദ്യാഭ്യാസമന്ത്രി പ്രള്‍ഹാദ് ജോഷിയും വിമര്‍ശിച്ചു. ഇന്ദിരാഗാന്ധി ഉള്‍പ്പെടെയുള്ള കോണ്‍ഗ്രസിന്റെ മുന്‍ പ്രധാനമന്ത്രിമാര്‍ വിദേശ നേതാക്കളെ ആലിംഗനം ചെയ്ത് സ്നേഹം പങ്കുവച്ചിരുന്നു.
ഇതിന്റെ ചിത്രങ്ങളടക്കം ചൂണ്ടിക്കാട്ടി രാഹുല്‍ ഗാന്ധിക്കെതിരെ വിമര്‍ശം ഉയര്‍ന്നതോടെ കോണ്‍ഗ്രസില്‍ നിന്നുപോലും പ്രതിഷേധമുണ്ട്‌
