രാമസേതു കടന്ന് വാനരസേന ലങ്കയിലെത്തി. യുദ്ധം അനിവാര്യമാണെന്ന് എല്ലാവര്‍ക്കും വ്യക്തമായിരുന്നു. അതിന് മുമ്പ് രാവണന്റെ അനുജനായ വിഭീഷണന്‍ അവസാനമായി സഹോദരനെ ഉപദേശിച്ചു. ‘സീതയെ ശ്രീരാമന് തിരിച്ചേല്‍പ്പിക്കുക. അധര്‍മ്മവഴി വെടിയുക. ‘എന്നാല്‍ അഹങ്കാരം സത്യത്തിന്റെ ശബ്ദം കേട്ടില്ല. കോപാകുലനായ രാവണന്‍ വിഭീഷണനെ സഭയില്‍ നിന്ന് അപമാനിച്ച് പുറത്താക്കി.
സ്വന്തം സഹോദരനെയും രാജ്യത്തെയും ഉപേക്ഷിച്ച് വിഭീഷണന്‍ ശ്രീരാമന്റെ ശരണം തേടി. വാനരസേനയില്‍ ചിലര്‍ അദ്ദേഹത്തെ സംശയിച്ചെങ്കിലും, ‘ശരണം പ്രാപിച്ചവനെ ഞാന്‍ ഒരിക്കലും കൈവിടുകയില്ല’ എന്ന് രാമന്‍ പ്രഖ്യാപിച്ചു. വിഭീഷണനെ സ്‌നേഹത്തോടെ സ്വീകരിക്കുകയും ഭാവിയിലെ ലങ്കാധിപനായി പ്രഖ്യാപിക്കുകയും ചെയ്തു. യുദ്ധം തുടങ്ങുന്നതിന് മുമ്പേ ധര്‍മ്മം തന്റെ പക്ഷത്തുള്ളവരെ തിരിച്ചറിഞ്ഞിരുന്നു.
സത്യത്തിന്റെ പക്ഷത്ത് നില്‍ക്കുക എല്ലായ്‌പ്പോഴും എളുപ്പമല്ല. ചിലപ്പോള്‍ സ്വന്തം ബന്ധങ്ങളെയും സൗകര്യങ്ങളെയും വിട്ടുനില്‍ക്കേണ്ടിവരും. എന്നാല്‍ ധര്‍മ്മത്തിന്റെ വഴി തെരഞ്ഞെടുക്കുന്നവര്‍ക്ക് നഷ്ടപ്പെടുന്നത് സ്ഥാനമാകാം; പക്ഷേ നേടുന്നത് ചരിത്രത്തിലെ ബഹുമതിയാണ്.
രാമസ്പര്‍ശം: രക്തബന്ധത്തേക്കാള്‍ മഹത്തായത് ധര്‍മ്മബന്ധമാണ്.
ജന്മഭൂമി ഓണ്‍ലൈന്‍