ന്യൂദല്ഹി: ആരോഗ്യ, വിദ്യാഭ്യാസ രംഗങ്ങളടക്കം പല മേഖലകളിലും തങ്ങളാണ് നമ്പര് വണ് എന്ന് ഊറ്റം കൊള്ളുന്ന കേരളത്തിലെ എല്ഡിഎഫ്, യുഡിഎഫ് സര്ക്കാരുകള്ക്ക് താക്കീതായി തൊഴിലില്ലായ്മ. തൊഴിലില്ലായ്മയിലും, നമ്പര് വണ് ആയ കേരളത്തില് ഇത് വളരെക്കൂടിയെന്നാണ് പുതിയ കണക്ക്.
ദേശീയ തലത്തില് തൊഴിലില്ലായ്മ നിരക്ക് 5.4 ശതമാനമാണെന്നിരിക്കേ കേരളത്തില് ഇത് 8.9 ശതമാനമാണ്. ജനുവരിയിലെ ലേബര് സര്വേയില് ഇത് 7.2 ശതമാനമായിരുന്നതാണ് ഇപ്പോള് ഒന്നര ശതമാനത്തിലേറെ കൂടി 8.9 ശതമാനത്തിലെത്തിയത്. ദേശീയ തലത്തില് ജനുവരിയില് അഞ്ചു ശതമാനമായിരുന്നു. ഇത് ലേശം വര്ധിച്ചാണ് ദേശീയ ശരാശരി 5.4 ശതമാനത്തിലെത്തിയത്.
കേരളത്തിനു മുമ്പില് രണ്ടു സംസ്ഥാനങ്ങളേയുള്ളൂ. ഛത്തീസ്ഗഡ് 12.8 ശതമാനം, ജമ്മു കശ്മീര് 9.1 ശതമാനം. അതേ സമയം ദേശീയ തലത്തില് യുവാക്കളുടെ തൊഴിലില്ലായ്മ കുറഞ്ഞതായി കേന്ദ്രം പാര്ലമെന്റില് അറിയിച്ചു. 2022ല് 15 മുതല് 29 വരെയുള്ളവരുടെ തൊഴിലില്ലായ്മ 10.9 ശതമാനമായിരുന്നത് 2025ല് 9.9 ശതമാനമായി കുറഞ്ഞു. മുദ്ര യോജന, തൊഴില് സൃഷ്ടിക്കല് പദ്ധതി, ദീന് ദയാല് ഉപാധ്യായ ഗ്രാമീണ് കൗശല്യ യോജന തുടങ്ങിയ നിരവധി കേന്ദ്ര പദ്ധതികളാണ് ഇതിനു കാരണം. സര്ക്കാര് മേഖലയിലെ തൊഴിലവസരങ്ങള് വര്ധിച്ചതും കാരണമായി. ചെറുകിട സൂക്ഷ്മ സംരംഭങ്ങളാണ് തൊഴിലില്ലായ്മ കുറയാന് മറ്റൊരു കാരണം.
തൊഴിലില്ലായ്മ കൂടുതല് കേരളത്തില് 8.9ശതമാനം; കുറവ് ഗുജറാത്തില്
യുവാക്കളുടെ തൊഴിലില്ലായ്മയും കേരളത്തിലാണ് കൂടുതല്. 18.2 ശതമാനം. ദേശീയ തലത്തില് ഇത് 9.9 ശതമാനം മാത്രമാണ്. യുപിയിലും ബീഹാറിലും ഇത് യഥാക്രമം 7.7 ശതമാനം, 12.1 ശതമാനം എന്നിങ്ങനെയാണ്. യുപി പോലുള്ള സംസ്ഥാനങ്ങളിലാണ് യുവാക്കളുടെ തൊഴിലില്ലായ്മ കൂടുതലെന്ന ധാരണ തിരുത്തുന്നതാണ് പുതിയ കണക്ക്. ഗുജറാത്തിലാണ് യുവാക്കളുടെ തൊഴിലില്ലായ്മ ഏറ്റവും കുറവ്. 2.5 ശതമാനം.
