മട്ടാഞ്ചേരി: കടലിനെയും തുറമുഖങ്ങളെയും ആഴമേറിയ ജലാശയങ്ങളെയും സ്‌ഫോടകവസ്തു മുക്തമാക്കാനുള്ള പരിശീലനം കൊച്ചിയില്‍ തുടങ്ങി.
നാവികസേനയും അമേരിക്കന്‍ നാവികസേനയും സംയുക്തമായാണ് അതിതീവ്ര സ്‌ഫോടകവസ്തു പരിശീലനം നടത്തുന്നത്. കൊച്ചി തുറമുഖ നഗരിയില്‍ ദക്ഷിണ നാവിക സേന കേന്ദ്രത്തില്‍ അഞ്ച് ദിവസം നീണ്ടുനില്‍ക്കുന്ന പരിശീലനം 14ന് സമാപിക്കും.
ഇരു നാവിക സേനകൡലെ മുങ്ങല്‍ വിദഗ്ധര്‍, എക്‌സ്‌പ്ലോസീവ്‌സ് ഓര്‍ഡനന്‍സ് ഡിസ്‌പ്ലോസീവ് (ഇഒഡി) സംഘവും ചേര്‍ന്നാണ് പരിശീലനം നടത്തുന്നത്. 2005 മുതല്‍ നടക്കുന്ന ഇത്തരം സേനാ പരിശീലനത്തിന്റെ എട്ടാം പതിപ്പാണിത്. ഇരു സേനാവിഭാഗങ്ങളിലെ വിദഗ്ധ സംഘങ്ങള്‍ക്ക് കുടുതല്‍ സുരക്ഷയും പരസ്പര സഹകരണം, ആശയ കൈമാറ്റം, ആധുനികത തുടങ്ങിയവയാണ് ഉഭയകക്ഷി ലക്ഷ്യം. മൈനുകളടക്കമുള്ളവ നീക്കം ചെയ്തും കപ്പലുകളിലെ ആയുധം നീര്‍വീര്യമാക്കിയും സ്‌ഫോടന സാധ്യതകളില്‍ സുരക്ഷയൊരുക്കുകയുമാണ് ഇഒഡി സംഘങ്ങള്‍ ചെയ്യുന്നത്. പശ്ചിമേഷ്യന്‍ യുദ്ധസാഹചര്യത്തില്‍ ഇത്തരം സംഘങ്ങളുടെ ആവശ്യമേറിയ ഘട്ടത്തില്‍ ഇരു രാജ്യങ്ങളിലെയും നാവിക സേനാ പരിശീലനം ഏറെ പ്രചോദനമാണന്ന് നാവിക കേന്ദ്രങ്ങള്‍ പറയുന്നു.
