മുംബൈ: ബട് വാര (Batwara) എന്ന ഹിന്ദി പദത്തിനര്ത്ഥം വിഭജനം എന്നാണ്. സ്വാഭാവികമായും ബട് വാര 1947 പറയുന്നത് ഇന്ത്യയുടെ വിഭജനത്തിന്റെ കഥയാണ്. രാജ് കുമാർ സന്തോഷി സംവിധാനം ചെയ്യുന്ന ഈ സിനിമയ്ക്ക് മുടക്കുന്നത് 150 കോടി രൂപ.
സിനിമയില് അഭിനയിക്കുന്ന നായികാനായകന്മാരുടെ പ്രതിഫലം വാര്ത്തയായിരിക്കുന്നു. സണ്ണി ഡിയോളിന് 60 കോടി ലഭിക്കുമ്പോള് പ്രീതി സിന്റയ്ക്ക് ലഭിക്കുക 10 കോടി രൂപ. പ്രശസ്ത നാടകകൃത്ത് അസ്ഗർ വജാഹത്തിന്റെ ‘ജിസ് ലാഹോർ നൈ വേഖ്യാ ഓ ജമ്യായ് നൈ’ എന്ന ജനപ്രിയ ഉറുദു നാടകത്തെ ആസ്പദമാക്കിയാണ് ചിത്രം നിർമ്മിച്ചിരിക്കുന്നത്. 1947-ലെ ഭാരത വിഭജനത്തിന്റെ പശ്ചാത്തലത്തില് ലാഹോറിലെ സാധാരണക്കാരായ മനുഷ്യരുടെ ജീവിതത്തിലുണ്ടായ ആഘാതങ്ങളും പ്രത്യാഘാതങ്ങളുമാണ് ചിത്രത്തിന്റെ പ്രധാന പ്രമേയം. മുൻപ് ഒരു ഹിന്ദു കുടുംബം താമസിച്ചിരുന്ന മന്ദിരത്തിലേക്ക് മാറിത്താമസിക്കുന്ന ഒരു മുസ്ലീം കുടുംബത്തെയും, വീടൊഴിഞ്ഞ് പോകാൻ കൂട്ടാക്കാതെ അവിടെത്തന്നെ കഴിയുന്ന പ്രായമായ ഹിന്ദു ഗൃഹനാഥയെയും കേന്ദ്രീകരിച്ചുള്ളതാണ് ഈ കഥ. ആഗസ്റ്റ് 14-നാണ് തിയേറ്ററുകളില് എത്തുന്നത്.
‘ദി ഹീറോ: ലവ് സ്റ്റോറി ഓഫ് എ സ്പൈ’, ‘ഫർസ്’, ‘ഭയ്യാജി സൂപ്പർഹിറ്റ്’ തുടങ്ങിയ ജനപ്രിയ ചിത്രങ്ങള്ക്ക് ശേഷം വീണ്ടും സണ്ണി ഡിയോളും പ്രീതി സിന്റയും ഒന്നിക്കുന്ന സിനിമയാണിത്. ആമിർ ഖാൻ പ്രൊഡക്ഷൻസിന്റെ ബാനറില് ആമിർ ഖാനും അപർണ പുരോഹിതും ചേർന്ന് നിർമ്മിക്കുന്ന ഈ ചിത്രത്തില് വൻ താരനിര തന്നെ അണിനിരക്കുന്നുണ്ട്.
മുതിർന്ന നടി ഷബാന ആസ്മി പ്രധാന വേഷത്തില് എത്തുന്നുണ്ടെങ്കിലും ഇവരുടെ പ്രതിഫല വിവരങ്ങള് വെളിപ്പെടുത്തിയിട്ടില്ല. എന്നാല് ചിത്രത്തില് അതിഥി വേഷത്തിലെത്തുന്ന അലി ഫസല് 7 കോടി രൂപയാണ് ഈടാക്കിയിരിക്കുന്നത് എന്നാണ് സൂചന. കരണ് ഡിയോള്, കനിക കപൂർ, അഭിമന്യു സിംഗ് എന്നിവരാണ് ചിത്രത്തിലെ മറ്റ് പ്രധാന കഥാപാത്രങ്ങളെ അവതരിപ്പിക്കുന്നത്.സംവിധായകന് രാജ്കുമാർ സന്തോഷിയും സണ്ണി ഡിയോളും മുൻപത്തെ ഹിറ്റ് ചിത്രങ്ങള്ക്ക് ശേഷം വീണ്ടും കൈകോർക്കുന്നു എന്ന പ്രത്യേകതയും ഇതിനുണ്ട്.
എ.ആർ. റഹ്മാൻ സംഗീതസംവിധാനം നിർവ്വഹിക്കുന്ന ചിത്രത്തിലെ ഗാനങ്ങള്ക്ക് വരികള് കുറിച്ചിരിക്കുന്നത് ജാവേദ് അക്തറാണ്.
