കാസര്കോട്: സ്കൂള് ക്വിസ് മത്സരത്തില് വിഡി സവര്ക്കറെ അനുകൂലിച്ച് ചോദ്യം ഉള്പ്പെടുത്തിയെന്ന് ആരോപിച്ച് അധ്യാപകനെ സസ്പെന്ഡ് ചെയ്തതിനെ തുടര്ന്ന് വിദ്യാഭ്യാസ മന്ത്രിക്കെതിരെ കാസര്കോട് ജില്ലയില് ബിജെപിയുടെ വന് പ്രതിഷേധം. കുമ്പള ജിഎച്ച്എസ്എസിന്റെ പുതിയ സ്കൂള് കെട്ടിടം ഉദ്ഘാടനം ചെയ്യാനെത്തിയ പൊതുവിദ്യാഭ്യാസ മന്ത്രി എന്.ഷംസുദ്ദീനെതിരെയാണ് ബിജെപിയുടെ ശക്തമായ പ്രതിഷേധം. ബിജെപി ജില്ലാ പ്രസിഡന്റ് എം.എല്. അശ്വിനിയുടെ നേതൃത്വത്തിലായിരുന്നു പ്രതിഷേധം നടത്തിയത്. മന്ത്രി ചടങ്ങില് പ്രസംഗിച്ചുകൊണ്ടിരിക്കെ വേദിക്ക് പുറത്ത് ബിജെപി പ്രവര്ത്തകര് പ്രതിഷേധവുമായി എത്തി.കഴിഞ്ഞ ദിവസം ജില്ലയില് സ്കൂള് വിദ്യാര്ഥികള്ക്കായി നടത്തിയ സ്വാതന്ത്ര്യദിന ക്വിസ് മത്സരത്തില് വി ഡി സവര്ക്കറുടെ പേര് ഉള്പ്പെടുത്തിയതിന്റെ പേരില് ബദിയടുക്ക പള്ളത്തടുക്ക എയുപി സ്കൂളിലെ അധ്യാപകന് ഗുരുപ്രസാദിനെ സസ്പെന്ഡ് ചെയ്തതിനെതിരെയായിരുന്നു പ്രതിഷേധം.പ്രതിഷേധവുമായി പ്രവര്ത്തകര് മന്ത്രി പ്രസംഗിക്കുന്ന വേദിക്ക് സമീപത്തേക്ക് നീങ്ങാന് ശ്രമിച്ചതോടെ പൊലീസ് തടയുകയും, തുടര്ന്ന് പ്രവര്ത്തകരെ ബലംപ്രയോഗിച്ച് സ്ഥലത്തുനിന്ന് നീക്കുകയും ചെയ്തു. ഇതിനിടെ മുദ്രാവാക്യം വിളികളുമായി മുസ്ലിം ലീഗ്, എംഎസ്എഫ് പ്രവര്ത്തകരും എത്തിയതോടെ സ്ഥലത്ത് നേരിയ സംഘര്ഷാവസ്ഥയുണ്ടായി.
തുടര്ന്ന് പൊലീസ് ബിജെപി പ്രവര്ത്തകരെ അറസ്റ്റ് ചെയ്ത് നീക്കി.അറസ്റ്റ് ചെയ്ത ബിജെപി പ്രവര്ത്തകരെ കയറ്റിയ പൊലീസ് വാഹനം ബിജെപി ജില്ലാ പ്രസിഡന്റ് എം.എല്. അശ്വിനിയുടെ നേതൃത്വത്തില് തടഞ്ഞതോടെ പ്രതിഷേധം കൂടുതല് ശക്തമായി. അധ്യാപകനെതിരെയുള്ള നടപടി അംഗീകരിക്കില്ലെന്നും സസ്പെന്ഷന് ഉത്തരവ് ഉടന് പിന്വലിക്കണമെന്നും അവര് ആവശ്യപ്പെട്ടു.
ബിജെപി പ്രവര്ത്തകനായത് കൊണ്ടാണ് അധ്യാപകനായ ഗുരുപ്രസാദിനെതിരെ സര്ക്കാര് തിടുക്കപ്പെട്ട് നടപടി എടുത്തതെന്നും സവര്ക്കര് എന്ന പേരാണ് അവര്ക്ക് യഥാര്ത്ഥത്തില് പ്രശ്നമെന്നും എം.എല്.അശ്വിനി ആരോപിച്ചു. ഇതിനെതിരെ വരും ദിവസങ്ങളിലും ശക്തമായ പ്രതിഷേധം തുടരുമെന്നും അവര് വ്യക്തമാക്കി.പൊലീസ് ഇടപെട്ട് പ്രതിഷേധക്കാരെ വേദിക്ക് സമീപത്തുനിന്ന് മാറ്റിയതോടെ ബിജെപി പ്രവര്ത്തകര് പ്രതിഷേധം കുമ്പള പൊലീസ് സ്റ്റേഷന് മുന്നിലേക്ക് മാറ്റി. ബിജെപി ജില്ലാ ജനസെക്രട്ടറി പി.ആര്.സുനില്, യുവമോര്ച്ച ജില്ലാ പ്രസിഡന്റ് അശ്വിന് കൊല്ലായി എന്നിവരെയാണ് പൊലീസ് അറസ്റ്റ് ചെയ്തത്. മന്ത്രിക്കെതിരെ മുദ്രാവാക്യം വിളിച്ച പ്രവര്ത്തകര് അധ്യാപകനെതിരായ നടപടി പിന്വലിക്കണമെന്ന് സ്റ്റേഷന് മുന്നിലും ആവശ്യപ്പെട്ടു.
ജന്മഭൂമി ഓണ്ലൈന്