കാസര്കോട് : വി ഡി സവര്ക്കറെ കുറിച്ചുളള ചോദ്യം ഫ്രീഡം ക്വിസില് ഉള്പ്പെടുത്തിയതിന് അധ്യാപകനെ സസ്പെന്ഡ് ചെയ്തതിനെതിരെ ശക്തമായ പ്രതിഷേധവുമായി ബിജെപി.കുമ്പള ജിഎച്ച്എസ്എസില് വിദ്യാഭ്യാസ മന്ത്രി എന് ഷംസുദ്ദീന് പങ്കെടുത്ത പരിപാടിയില് പ്രതിഷേധിച്ച ബിജെപി പ്രവര്ത്തകരെ പൊലീസ് അറസ്റ്റ് ചെയ്തു നീക്കി.
ചോദ്യം തയാറാക്കിയ അധ്യാപകന് ഗുരുപ്രസാദിനെതിരായ നടപടി മുസ്ലീം ലീഗിനെയും ജമാഅത്തെ ഇസ്ലാമിയെയും പ്രീണിപ്പിക്കാനാണെന്ന് പ്രതിഷേധത്തിനിടെ പ്രവര്ത്തകര് പറഞ്ഞു.ചോദ്യങ്ങള് തയാറാക്കിയത് കോണ്ഗ്രസ് സംഘടനയിലെ അംഗമായ അധ്യാപിക ഉള്പ്പെടെ ഉള്ളവരാണെന്നും അധ്യാപകനെതിരെയുള്ള നടപടി അംഗീകരിക്കില്ലെന്നും ബിജെപി അറിയിച്ചു.
കാസര്ഗോഡ് ജില്ലയിലെ മന്ത്രിയുടെ പരിപാടികള് ബഹിഷ്കരിക്കുമെന്ന് ബിജെപി പ്രവര്ത്തകര് പറഞ്ഞു.കുമ്പളയിലെ വിദ്യാഭ്യാസ മന്ത്രി പങ്കെടുത്ത പരിപാടിയില് പ്രതിഷേധ പ്രകടനം നടത്തിയ ബി ജെക്കെതിരെ യുഡിഎഫ് പ്രവര്ത്തകരും മുദ്രാവാക്യം വിളികളുമായി എത്തിയത് സംഘര്ഷ സാഹചര്യം സൃഷ്ടിച്ചു.പിന്നീട് പ്രവര്ത്തകരെ പൊലീസ് ബലം പ്രയോഗിച്ച് അറസ്റ്റ് ചെയ്തു നീക്കി. അറസ്റ്റ് ചെയ്തവരെ വിട്ടയയ്ക്കണം എന്ന് ആവശ്യപ്പെട്ട് എംഎല് അശ്വിനിയുടെ നേതൃത്വത്തില് ബിജെപി പ്രവര്ത്തകര് കുമ്പള പൊലീസ് സ്റ്റേഷന് മുന്നിലും കുത്തിയിരുന്നു.
അതേസമയം, ഫ്രീഡം ക്വിസ് ചോദ്യ വിവാദത്തില് കൂടുതല് ഉദ്യോഗസ്ഥര്ക്ക് പങ്കുണ്ടെങ്കില് നടപടിയെടുക്കുമെന്ന് വിദ്യാഭ്യാസമന്ത്രി എന് ഷംസുദ്ദീന് പ്രതികരിച്ചു.
ബ്രിട്ടീഷുകാരില് നിന്ന് ഏറ്റവും കൂടുതല് ശിക്ഷ അനുഭവിച്ച സ്വാതന്ത്ര്യ സമര സേനാനി ആരെന്നാണ് ചോദ്യം.ഉത്തര സൂചികയില് വി ഡി സവര്ക്കറുടെ പേരും ഉള്പ്പെടുത്തിയതാണ് എം എസ് എഫിനെയും ഡി വൈ എഫ് ഐയും പോലുളള സംഘടനകളുടെ അസഹിഷ്ണുതയ്ക്ക് കാരണം.സവര്ക്കറെ കുറിച്ച് ചോദ്യം ക്വിസില് ഉള്പ്പെടുത്തിയതിനെതിരെ എം എസ് എഫും ഡി വൈ എഫ് ഐയും നേരത്തേ പ്രതിഷേധിച്ചിരുന്നു.വീര് സവര്ക്കര് ഹിന്ദുത്വ ആശയങ്ങള് പിന്തുടര്ന്ന വ്യക്തി ആയതിനാലാണ് ഈ സംഘടനകളുടെ വിരോധത്തിന് കാരണം.
ബ്രിട്ടീഷ് ഭരണകാലത്ത് സ്വാതന്ത്ര്യസമരത്തില് പങ്കെടുത്തതിന് വി ഡി സവര്ക്കറെ ഏറെ വര്ഷം ജയിലിലടച്ചിരുന്നു. കൊടിയ പീഡനങ്ങളാണ് അദ്ദേഹം ശിക്ഷാ കാലയളവില് ഏറ്റുവാങ്ങിയത്.
