തിരുവനന്തപുരം: റെയില്‍വേ ഡിജിറ്റല്‍ ടിക്കറ്റ് ബുക്കിങ്ങില്‍ കേരളത്തിന് വലിയ മുന്നേറ്റം. റെയില്‍വണ്‍ ആപ്പുവഴിയുള്ള ടിക്കറ്റ് വില്‍പനയില്‍ ഒന്നാംസ്ഥാനം കേരളത്തിന്. ദക്ഷിണ റെയില്‍വേ പുറത്തുവിട്ട ജൂലൈ മാസത്തെ കണക്കുകളാണ് കേരളത്തിന്റെ ഡിജിറ്റല്‍ ടിക്കറ്റ് ഉപയോഗ മുന്നേറ്റം വ്യക്തമാക്കുന്നത്.
ജൂലൈ മാസത്തില്‍ തിരുവനന്തപുരം, പാലക്കാട് ഡിവിഷനുകള്‍ ചേര്‍ന്ന് റെയില്‍വണ്‍ ആപ്പ് വഴി 9.76 ലക്ഷം ടിക്കറ്റുകളാണ് വിറ്റത്. ഇതില്‍ തിരുവനന്തപുരം ഡിവിഷന്‍ ഒരു മാസത്തിനിടെ 6.67 ലക്ഷം ടിക്കറ്റുകള്‍ റെയില്‍വണ്‍ ആപ്പ് വഴി വിറ്റ് ദക്ഷിണ റെയില്‍വേയില്‍ ഒന്നാം സ്ഥാനത്തെത്തി.
ജൂലൈയില്‍ തിരുവനന്തപുരം ഡിവിഷന്‍ ആകെ 30 ലക്ഷം ടിക്കറ്റുകളാണ് വിറ്റത്. ഇതിന്റെ 21.84 ശതമാനമായ 6.67 ലക്ഷം ടിക്കറ്റുകള്‍ റെയില്‍വണ്‍ ആപ്പ് വഴിയായിരുന്നു.
പാലക്കാട് ഡിവിഷനില്‍ ആകെ വിറ്റ 26.55 ലക്ഷം ടിക്കറ്റുകളില്‍ റെയില്‍വണ്‍ ആപ്പ് വഴി 11.64 ശതമാനം (3.09 ലക്ഷം) വിഹിതവുമായി ദക്ഷിണ റെയില്‍വേയില്‍ മൂന്നാം സ്ഥാനത്തെത്തി. 15.52 ശതമാനം ആപ്പ് ബുക്കിങ്ങുമായി ചെന്നൈ ഡിവിഷനാണ് രണ്ടാം സ്ഥാനത്ത്. തിരുച്ചിറപ്പള്ളി 11.13 ശതമാനവും, സേലം 10.75 ശതമാനവും, മധുര 10.09 ശതമാനവും ആണ് ആപ്പുവഴി ബുക്കുചെയ്തത്.
കേരളത്തില്‍ നിന്നുള്ള യാത്രാ ടിക്കറ്റുകളുടെ വില്‍പനയിലൂടെ 2025-26 സാമ്പത്തിക വര്‍ഷത്തില്‍ റെയില്‍വേയ്‌ക്ക് ലഭിച്ചത് 2,960.70 കോടി രൂപയാണ്. ഇതില്‍ 1,876.18 കോടി രൂപ തിരുവനന്തപുരം ഡിവിഷനില്‍ നിന്നും 1,084.51 കോടി രൂപ പാലക്കാട് ഡിവിഷനില്‍ നിന്നുമാണ് ലഭിച്ചത്.
