ലണ്ടണ്‍: 2030 ഫിഫ ലോകകപ്പിന്റെ ഫൈനല്‍ പോരാട്ടത്തിന് വേദിയൊരുക്കാന്‍ മൊറോക്കോയ്ക്ക് വാഗ്ദാനം നല്‍കിയെന്ന വാര്‍ത്തകള്‍ നിഷേധിച്ച് ഫിഫ. വരാനിരിക്കുന്ന പ്രസിഡന്റ് തിരഞ്ഞെടുപ്പില്‍ ഏഷ്യന്‍-ആഫ്രിക്കന്‍ രാജ്യങ്ങളുടെ പിന്തുണ ഉറപ്പാക്കുന്നതിനായി ഫിഫ പ്രസിഡന്റ് ജിയാനി ഇന്‍ഫാന്റിനോ മൊറോക്കോയ്ക്ക് ഫൈനല്‍ മത്സരം വാഗ്ദാനം ചെയ്‌തെന്നായിരുന്നു റിപ്പോര്‍ട്ട്.
ഫിഫ പ്രസിഡന്റ് സ്ഥാനത്തേക്ക് വീണ്ടും തിരഞ്ഞെടുക്കപ്പെടാനുള്ള നീക്കങ്ങളുടെ ഭാഗമായി, ആഫ്രിക്കന്‍ ഫുട്‌ബോള്‍ കോണ്‍ഫെഡറേഷന്റെ പിന്തുണ ഉറപ്പാക്കാനാണ് ഇന്‍ഫന്റിനോ ഈ വാഗ്ദാനം നല്‍കിയതെന്ന് റിപ്പോര്‍ട്ടുകള്‍ സൂചിപ്പിക്കുന്നു. 2030 ലോകകപ്പ് സ്‌പെയിന്‍, പോര്‍ച്ചുഗല്‍, മൊറോക്കോ എന്നീ രാജ്യങ്ങള്‍ സംയുക്തമായാണ് സംഘടിപ്പിക്കുന്നത്. സ്‌പെയിനിലെ സാന്റിയാഗോ ബെര്‍ണബ്യു സ്‌റ്റേഡിയമാണ് ഫൈനല്‍ വേദിയായി മുന്‍പന്തിയിലുണ്ടായിരുന്നത്. എന്നാല്‍ മൊറോക്കോയിലെ കാസബ്ലാങ്കയില്‍ നിര്‍മ്മാണത്തിലിരിക്കുന്ന 1,15,000 കാണികളെ ഉള്‍ക്കൊള്ളാവുന്ന ‘ഹസ്സന്‍ സ്‌റ്റേഡിയം’ ഫൈനലിനായി നല്‍കിയേക്കുമെന്ന വാര്‍ത്ത സ്‌പെയിനില്‍ വലിയ ആഘാതമുണ്ടാക്കി.
വാര്‍ത്തകള്‍ പൂര്‍ണ്ണമായും തെറ്റിദ്ധരിപ്പിക്കുന്നതും വാസ്തവവിരുദ്ധവുമാണെന്ന് ഫിഫ വ്യക്തമാക്കി. 2030 ലോകകപ്പ് ഫൈനലിന്റെ വേദിയെക്കുറിച്ച് ഇന്‍ഫാന്റിനോ യാതൊരുവിധ വാഗ്ദാനവും നല്‍കിയിട്ടില്ലെന്നും, യഥാസമയം ഫിഫ ഔദ്യോഗികമായി തീരുമാനം കൈക്കൊള്ളുമെന്നും അറിയിച്ചു. സ്വകാര്യ നിക്ഷേപകരില്‍ നിന്ന് ഫണ്ട് സ്വീകരിക്കാനുള്ള പദ്ധതികളില്‍ യൂറോപ്യന്‍ ഫുട്‌ബോള്‍ സംഘടനകളില്‍ നിന്ന് ശക്തമായ എതിര്‍പ്പ് ഉയര്‍ന്നതിനാല്‍ ഇന്‍ഫാന്റിനോ വലിയ രാഷ്‌ട്രീയ സമ്മര്‍ദം നേരിടുന്നുണ്ട്.
