BMSതിരുവനന്തപുരം: ബിഎംഎസ് സംസ്ഥാന ജനറല് സെക്രട്ടറിയും പ്രമുഖ സംഘടനാ പ്രവര്ത്തകനുമായ ജി.കെ. അജിത്തിന്റെ ഭൗതിക ശരീരം ആചാരപരമായ ചടങ്ങുകളോടെ വന് ജനാവലിയുടെ സാന്നിധ്യത്തില് സംസ്കരിച്ചു. സമൂഹത്തിന്റെ നാനാഭാഗങ്ങളില് നിന്നെത്തിയ നൂറുകണക്കിന് ആളുകളുടെയും രാഷ്ട്രീയ സാമൂഹിക രംഗത്തെ പ്രമുഖരുടെയും സാന്നിധ്യത്തിലാണ് അന്തിമോപചാര ചടങ്ങുകള് നടന്നത്.
ചൊവ്വാഴ്ച വൈകിട്ട് 6 മണി മുതല് നെട്ടയം പാപ്പാട് ലെയ്ന് ഐശ്വര്യയിലെ വീട്ടില് പൊതുദര്ശനത്തിനു വെച്ച ഭൗതികദേഹത്തില് ആദരാഞ്ജലികള് അര്പ്പിക്കാനായി സമൂഹത്തിന്റെ വിവിധ തുറകളിലുള്ള നിരവധി പ്രമുഖരും പ്രവര്ത്തകരും എത്തിച്ചേര്ന്നു. തുടര്ന്ന് ഇന്നലെ രാവിലെ 12 മണിയോടെ ശാന്തി കവാടത്തിലാണ് സംസ്കാര ചടങ്ങുകള് നടന്നത്. അദ്ദേഹത്തിന്റെ പെണ്മക്കളായ ഡോ. പൂജ അജിത്, പുണ്യ അജിത് എന്നിവര് ചേര്ന്ന് അന്തിമ ചടങ്ങുകള്ക്കും സംസ്കാര കര്മ്മങ്ങള്ക്കും നേതൃത്വം നല്കി.
പ്രിയനേതാവിന് അന്തിമോപചാരം അര്പ്പിക്കാനായി ആര്എസ്എസ്, ബിഎംഎസ്, ബിജെപി, ഹിന്ദു ഐക്യവേദി, ഫെറ്റോ തുടങ്ങി വിവിധ ദേശീയ പ്രസ്ഥാനങ്ങളുടെ ഉന്നത നേതാക്കളും ജനപ്രതിനിധികളും വീട്ടിലും ശാന്തി കവാടത്തിലും എത്തിയിരുന്നു.
ആര്എസ്എസ് ക്ഷേത്രീയ കാര്യവാഹ് എം. രാധാകൃഷ്ണന്, ദക്ഷിണ കേരളം പ്രാന്ത പ്രചാരക് എസ്. സുദര്ശന്, ദക്ഷിണ കേരളം പ്രാന്ത കാര്യവാഹ് ടി.വി. പ്രസാദ് ബാബു, മുതിര്ന്ന പ്രചാരക് എ.എം. കൃഷ്ണന്, ബിഎംഎസ് സംസ്ഥാന പ്രസിഡന്റ് ബി. ശിവജി സുദര്ശനന്, വി. മുരളീധരന് എംഎല്എ, ബിജെപി സംസ്ഥാന ജനറല് സെക്രട്ടറിമാരായ ശോഭാ സുരേന്ദ്രന്, അഡ്വ.എസ്. സുരേഷ്, വൈസ് പ്രസിഡന്റ് ആര്.ശ്രീലേഖ, ഹിന്ദു ഐക്യവേദി സംഘടനാ സെക്രട്ടറി സി.ബാബു, സംസ്ഥാന സെക്രട്ടറി കെ. പ്രഭാകരന്, ബിഎംഎസ് അഖിലേന്ത്യാ ഓര്ഗനൈസിംഗ് സെക്രട്ടറി സുരേന്ദ്ര, ക്ഷേത്രീയ സംഘടനാ സെക്രട്ടറി രാധാകൃഷ്ണന്, അഖിലേന്ത്യാ വൈസ് പ്രസിഡന്റ് ഉണ്ണികൃഷ്ണന് ഉണ്ണിത്താന്, മുന് അഖിലേന്ത്യാ സെക്രട്ടറി സജി നാരായണന്, ഉത്തര മധ്യ ഭാരതസംഘടനാ സെക്രട്ടറി സി.വി. രാജേഷ്, ദക്ഷിണ ക്ഷേത്രീയ സംഘടനാ സെക്രട്ടറി കെ.പി. രാജീവ്, ഡെപ്യൂട്ടി ജനറല് സെക്രട്ടറി സി. ബാലചന്ദ്രന്, സംസ്ഥാന സെക്രട്ടറിമാരായ കെ.വി. മധു, രാജേഷ്, പി.വി. ഗോപകുമാര്,സാബു.ജി, ട്രഷറര് സിബി വര്ഗീസ് തുടങ്ങിയ വിവിധ സംഘടനാ പ്രതിനിധികളും സാംസ്കാരിക പ്രവര്ത്തകരും കണ്ണീരില് കുതിര്ന്ന യാത്രാമൊഴിയോടെ അജിത്തിന് വിട ചൊല്ലി.
നാടിന്റെ നാനാഭാഗങ്ങളില് നിന്നുള്ള നൂറുകണക്കിന് പ്രവര്ത്തകരുടെ സാന്നിധ്യം ചടങ്ങുകളെ ഏറെ വികാരാധീനമാക്കി. തൊഴിലാളി പ്രസ്ഥാന രംഗത്ത് നിസ്തുലമായ സേവനങ്ങള് കാഴ്ചവെച്ച ജി.കെ. അജിത്തിന്റെ വിയോഗം സംഘടനയ്ക്കും പൊതുസമൂഹത്തിനും വലിയ നഷ്ടമാണ് ഉണ്ടാക്കിയിട്ടുള്ളത്.
