തിരുവനന്തപുരം: ചിട്ടയായ പ്രവര്‍ത്തനത്തിലൂടെ എംപ്ലോയീസ് സംഘിനെ കെഎസ്ആര്‍ടിസിയിലെ അംഗീകൃത സംഘടനയായി മാറ്റുന്നതില്‍ നടുനായകത്വം വഹിച്ച വ്യക്തിത്വമാണ് ഇന്നലെ അന്തരിച്ച ജി.കെ. അജിത് എന്ന് കെഎസ്ടി എംപ്ലോയീസ് സംഘ് സംസ്ഥാന ജനറല്‍ സെക്രട്ടറി എസ്.അജയകുമാര്‍.
കെഎസ്ടി എംപ്ലോയീസ് സംഘിന്റെ സംസ്ഥാന അധ്യക്ഷന്‍ എന്ന നിലയില്‍ അദ്ദേഹത്തിന്റെ പ്രവര്‍ത്തനങ്ങള്‍ കെഎസ്ആര്‍ടിസിയുടെയും ജീവനക്കാരുടെയും ഉന്നമനത്തിനുവേണ്ടിയുള്ളതായിരുന്നു. മന്ത്രി തലത്തിലും ഉദ്യോഗസ്ഥ തലത്തിലും ജീവനക്കാരുടെ വിഷയങ്ങള്‍ അവതരിപ്പിച്ചുകൊണ്ട് അനുഭാവ പൂര്‍ണമായ തീരുമാനങ്ങളിലേക്ക് എത്തിക്കുവാന്‍ അദ്ദേഹം നിരന്തരം ശ്രമിച്ചു. 2021ലെ ശമ്പള പരിഷ്‌കരണവുമായി ബന്ധപ്പെട്ട് അദ്ദേഹത്തിന്റെ ഇടപെടല്‍ കെഎസ്ആര്‍ടിസിയിലെ ഒരു തൊഴിലാളിക്കും മറക്കാനാവാത്ത കാര്യമാണ്.
അദ്ദേഹത്തിന്റെ വിയോഗം കെഎസ്ആര്‍ടിസി ജീവനക്കാര്‍ക്കും കെഎസ്ടി എംപ്ലോയീസ് സംഘിനും തീരാനഷ്ടമാണെന്ന് എസ്. അജയകുമാര്‍ പറഞ്ഞു.
