കൊല്ലം: കേന്ദ്ര- സംസ്ഥാന സര്ക്കാരുകള് തൊഴിലാളി വിരുദ്ധ നയങ്ങള് തിരുത്തണമെന്ന് ആവശ്യപ്പെട്ട് ബിഎംഎസ് സംഘടിപ്പിച്ച ദേശീയ പ്രക്ഷോഭത്തില് തൊഴിലാളികളുടെ രോഷമിരമ്പി. ദേശീയ പ്രക്ഷോഭത്തിന്റെ ഭാഗമായി കൊല്ലം ചിന്നക്കടയിലെ മാര്ച്ചും ധര്ണയും ബിഎംഎസ് സംസ്ഥാന പ്രസിഡന്റ് ബി. ശിവജി സുദര്ശന് ഉദ്ഘാടനം ചെയ്തു.
കേന്ദ്ര സര്ക്കാര് നടപ്പാക്കിയ നാല് കോഡുകളിലെ അപാകങ്ങള് പരിഹരിച്ച് തൊഴിലാളികള്ക്ക് അനുകൂലമായി നടപ്പാക്കണം. ജനദ്രോഹനടപടികള് തിരുത്തണം, ഇപിഎസ് 95 പ്രകാരമുള്ള കുറഞ്ഞ പെന്ഷന് 7500 ആയി വര്ദ്ധിപ്പിച്ച് വിഡിഎയെയും ആയുഷ്മാന് ഭാരത് പദ്ധതിയെയും ഇതുമായി ബന്ധിപ്പിക്കണം. ഇഎസ്ഐ പരിധി 21,000ല് നിന്ന് 42,000 ആയി വര്ദ്ധിപ്പിക്കണം. എത്രയും വേഗം ആവശ്യങ്ങള് അംഗീകരിച്ച് നടപ്പാക്കാത്ത പക്ഷം ശക്തമായ പ്രക്ഷോഭ പരിപാടികള് ആവിഷ്കരിക്കുമെന്നും അദ്ദേഹം കൂട്ടിച്ചേര്ത്തു.
ബിഎംഎസ് ജില്ലാ പ്രസിഡന്റ് പി.വി. അനില്കുമാര് അധ്യക്ഷനായി. ജില്ലാ സെക്രട്ടറി ആര്. സനില്കുമാര്, ദേശീയ സമിതി അംഗം പി. ജയപ്രകാശ്, ജില്ലാ ട്രഷറര് സി. സജീവ്, ബി. ജയപ്രകാശ് എന്നിവര് പ്രസംഗിച്ചു. കൊല്ലം ആശ്രാമം മൈതാനത്ത് നിന്നാരംഭിച്ച പ്രകടനം ചിന്നക്കട പോസ്റ്റ് ഓഫീസ് പടിക്കലിലാണ് സമാപിച്ചത്. സംസ്ഥാന സമിതി അംഗങ്ങളും ജില്ലാ ഭാരവാഹികളും മാര്ച്ചിന് നേതൃത്വം നല്കി.
