വടവാതൂര്‍: വെള്ളപ്പൊക്ക ദുരിതബാധിതര്‍ക്കായി തുറന്ന ക്യാമ്പില്‍ ഭക്ഷണവും കുടിവെള്ളവുമില്ലെന്ന വ്യാജപ്രചാരണവുമായി ഡിവൈഎഫ്‌ഐയും ദേശാഭിമാനി പത്രവും. ഈ ക്യാമ്പിലടക്കം പ്രദേശത്ത് ദുരിതബാധിതര്‍ക്ക് എല്ലാ സഹായവും ചെയ്യുന്നതാകട്ടെ സേവാഭാരതി പ്രവര്‍ത്തകരും.
വിജയപുരം ഗ്രാമപ്പഞ്ചായത്തില്‍ നാലാം വാര്‍ഡില്‍ പാറമ്പുഴ പെരിങ്ങള്ളൂര്‍ എല്‍പി സ്‌കുളില്‍ പ്രവര്‍ത്തിക്കുന്ന ദുരിതാശ്വാസ ക്യാമ്പില്‍ പഞ്ചായത്തിലെ വിവിധ വാര്‍ഡിലെ ദുരിതബാധിതര്‍ താമസിക്കുന്നുണ്ട്. ഇവര്‍ക്കാവശ്യമായ എല്ലാ സഹായങ്ങളും ചെയ്യുന്നത് പാറമ്പുഴയിലെയും വടവാതൂരിലെയും സേവാഭാരതി പ്രവര്‍ത്തകരാണ്. ഉയര്‍ന്ന പ്രദേശത്താണ് ക്യാമ്പ് പ്രവര്‍ത്തിക്കുന്ന സ്‌കൂള്‍. ഇങ്ങോട്ടുള്ള വഴികളും താഴ്ന്ന പ്രദേശങ്ങളും വെള്ളം കയറിക്കിടക്കുകയാണ്. ചില സ്ഥലങ്ങളില്‍ ഒരാള്‍പ്പൊക്കത്തിലേറെ വെള്ളമുണ്ട്. മീനച്ചിലാറ്റില്‍ നിന്നും വെള്ളം ഇരച്ചുകയറുന്ന പ്രദേശം കൂടിയാണിത്. സമീപത്താണ് മീനന്തറയാര്‍. ഇരുപുഴകളിലേയും വെള്ളം ഇരച്ചുകയറി പ്രദേശത്ത് വലിയ പ്രളയമാണ്. സ്വന്തം ജീവന്‍ പോലും വകവെക്കാതെയാണ് സേവാഭാരതി പ്രവര്‍ത്തകര്‍ ദുരിതബാധിതര്‍ക്കായി വെള്ളവും ഭക്ഷണവുമെല്ലാം ക്യാമ്പില്‍ ദിവസവും എത്തിക്കുന്നത്.
ഈ സാഹചര്യത്തിലാണ് ദുരിതബാധിതര്‍ക്ക് വെള്ളവും ഭക്ഷണവും ഇല്ലെന്ന് ദേശാഭിമാനിയും വടവാതൂരിലെ ചില ഡിവൈഎഫ്‌ഐ പ്രാദേശിക നേതാക്കളും വ്യാജപ്രചാരണം നടത്തുന്നത്. ക്യാമ്പ് തുടങ്ങിയ നാള്‍ മുതല്‍ നാലാം വാര്‍ഡിലെ പഞ്ചായത്തംഗം രാജേന്ദ്രന്‍ പാറേപ്പറമ്പില്‍ സ്വന്തം കുടുംബകാര്യങ്ങള്‍ പോലും ശ്രദ്ധിക്കാതെ ദുരിതാശ്വാസ പ്രവര്‍ത്തനത്തില്‍ സജീവമാണ്. രാജേന്ദ്രന്റെ വീടിന്റെ പരിസരമാകെ വെള്ളം കയറിക്കിടക്കുന്നു.
രാവിലെ സേവാഭാരതി പ്രവര്‍ത്തകര്‍ വള്ളവുമായെത്തി രാജേന്ദ്രനെയും കൂട്ടി വാര്‍ഡിലെ വെള്ളപ്പൊക്കക്കെടുതി അനുഭവിക്കുന്നവര്‍ക്ക് ആശ്വാസമേകാന്‍ രംഗത്തിറങ്ങും. വീടുകളില്‍ ഒറ്റപ്പെട്ടുപോയവരെയും കിടപ്പു രോഗികളെയും സുരക്ഷിത സ്ഥാനത്തെക്ക് മാറ്റാനുള്ള ശ്രമകരമായ പ്രവര്‍ത്തനത്തിലാണ് ഇവര്‍.രാഷ്‌ട്രീയവും വാര്‍ഡും നോക്കാതെയാണ് പഞ്ചായത്തംഗവും സേവാഭാരതി പ്രവര്‍ത്തകരും സേവന പ്രവര്‍ത്തനത്തിനിറങ്ങുന്നത്. ക്യാമ്പില്‍ താമസിക്കുന്ന ഇടതുപക്ഷ അനുഭാവികള്‍ പോലും ഇക്കാര്യം തുറന്നു പറയുന്നു. ദേശാഭിമാനിയുടെയും ഡിവൈഎഫ്‌ഐയുടെയും വ്യാജ പ്രചാരണത്തില്‍ പ്രതിഷേധം ശക്തമാണ്.
