ഇസ്ലാമബാദ്: പാകിസ്ഥാനില് നിന്ന് വേര്പെട്ട് സ്വതന്ത്ര രാഷ്ട്രമെന്ന പ്രഖ്യാപനം നടത്തിയതായി അവകാശപ്പെട്ട റിപ്പബ്ലിക് ഓഫ് ബലൂചിസ്ഥാന് ആഗസ്ത് 11 സ്വാതന്ത്ര്യദിനമായി ആഘോഷിക്കുമെന്ന് പ്രഖ്യാപിച്ചു. ലോകമെമ്പാടുമുള്ള ബലൂച് സമൂഹത്തോട് ദിനം വിപുലമായി ആഘോഷിക്കാനും സ്വതന്ത്ര ബലൂചിസ്ഥാന്റെ പതാക ഉയര്ത്താനും ആഹ്വാനം ചെയ്തു.
ബലൂച് വിമോചന നേതാവ് മിര് യാര് ബലൂച് ഉള്പ്പെടെയുള്ളവര് നടത്തിയ പ്രഖ്യാപനത്തിലാണ് പുതിയ നീക്കം. വീടുകള്, വ്യാപാര സ്ഥാപനങ്ങള്, വിദ്യാഭ്യാസ സ്ഥാപനങ്ങള്, പൊതുസ്ഥലങ്ങള് എന്നിവിടങ്ങളില് ബലൂച് പതാക ഉയര്ത്തി ആഗസ്റ്റ് 11 ആചരിക്കണമെന്നാണ് ആഹ്വാനം. എല്ലാ വര്ഷവും ഈ ദിവസം ദേശീയദിനമായി ആചരിക്കുമെന്നും പ്രഖ്യാപനത്തില് പറയുന്നു.
ബലൂചിസ്ഥാന് സ്വതന്ത്രവും പരമാധികാരമുള്ളതുമായ രാഷ്ട്രമാണെന്ന നിലപാടാണ് പ്രഖ്യാപനത്തിലുള്ളത്. അന്താരാഷ്ട്ര സമൂഹം ബലൂചിസ്ഥാന്റെ സ്വാതന്ത്ര്യം ഔദ്യോഗികമായി അംഗീകരിക്കണമെന്നും നേതാക്കള് ആവശ്യപ്പെട്ടു. സ്വാതന്ത്ര്യവും പരമാധികാരവും അംഗീകരിക്കപ്പെടുന്നതിലൂടെ മാത്രമേ മേഖലയില് ദീര്ഘകാല സമാധാനവും വികസനവും സാധ്യമാകൂവെന്നും അവര് അവകാശപ്പെട്ടു.
1947 ആഗസ്ത് 11 ബലൂചിസ്ഥാന്റെ ചരിത്രത്തിലെ നിര്ണായക ദിവസമാണെന്നാണ് സ്വാതന്ത്ര്യവാദികളുടെ വാദം. ബ്രിട്ടീഷ് ഭരണത്തില്നിന്നുള്ള പിന്മാറ്റത്തിന്റെ ഘട്ടത്തില് കാലത്ത് ഉള്പ്പെടെയുള്ള ബലൂച് പ്രദേശങ്ങളുടെ രാഷ്ട്രീയ പദവിയുമായി ബന്ധപ്പെട്ട സംഭവങ്ങളാണ് ഇതിന് അടിസ്ഥാനം.
1947 ആഗസ്റ്റ് 11ന് രാവിലെ സ്വാതന്ത്ര്യം പ്രഖ്യാപിച്ചിരുന്നുവെന്നും പിന്നീട് 1948ല് പാകിസ്ഥാന്റെ നിയന്ത്രണത്തിലായെന്നും ബലൂച് ദേശീയവാദികള് വാദിക്കുന്നു.
