അംഗഛേദം വന്ന ശൂര്പ്പണഖയെ ആദ്യം കാണുന്നത് അര്ധസഹോദരന് ഖരനാണ്. ഈ ക്രൂരകൃത്യത്തിലൂടെ സ്വയം മരണവക്ത്രത്തെ വരിച്ചതാരെന്നാണ് അയാളുടെ ചോദ്യം. രാക്ഷസരെങ്കിലും സുദൃഢമായ സാഹോദര്യം! തനിക്ക് ഈ ഗതിവരുത്തിയ രാമലക്ഷ്മണന്മാരുടെ ചോര കുടിച്ചു ദാഹം തീര്ക്കണമെന്ന സഹോദരിയുടെ ആഗ്രഹം നടത്താന് ഖരന് അയച്ച പതിനാലു രാക്ഷസരും രാമസായകത്താല് യമപുരി പൂകി.
ബ്രഹ്മാണ്ഡം നടുങ്ങുമാറുള്ള ഖരന്റെ പുറപ്പാടാണ് പിന്നാലെ. ദൂഷണനും ത്രിശിരസ്സും പതിനാലായിരം പടയാളികളും ഒപ്പം. ഘോരമായ യുദ്ധത്തിനൊടുവില് ഒറ്റയ്ക്കുനിന്നു പോരാടിയ ഖരന്റെ ശിരസ്സ് ഇന്ദ്രദൈവതാസ്ത്രത്താല് ലങ്കാനഗരത്തിന്റെ വടക്കേ കവാടത്തോളം! മൂന്നേമുക്കാല് നാഴികയാണ് ഈ വന് സംഘത്തെ ഇല്ലാതാക്കാന് ശ്രീരാമചന്ദ്രനു വേണ്ടിവന്നത്. ഭഗവല്കരങ്ങളാല് മൃത്യു എന്നാല് മോക്ഷപ്രാപ്തി എന്നുതന്നെ.
അപമാനത്തിന്റെ രോഷവും വേദനയും അടങ്ങുന്നില്ല ശൂര്പ്പണഖയ്ക്ക്. നേരാങ്ങള രാവണനെ കാണുകതന്നെ ഇനി.
ജന്മഭൂമി ഓണ്ലൈന്