മുംബൈ: മോദി ഗുജറാത്തില് മുഖ്യമന്ത്രിയായിരുന്ന കാലത്ത് ഗുജറാത്തിലെ അഹമ്മദാബാദിലും ഇന്ത്യയുടെ വിവിധ ഭാഗങ്ങളിലും നടന്ന 13ഓളം ബോംബ് സ്ഫോടന പരമ്പരകളെ ഒറ്റയടിക്ക് നിര്ത്തിയ ആളാണ് അജിത് ഡോവലെന്ന് അമിത് ഷാ. മുംബൈയില് 2026ലെ ലോകമാന്യതിലക് ദേശീയ പുരസ്കാരം ഇന്ത്യയുടെ ദേശീയ സുരക്ഷാ ഉപദേഷ്ടാവായ അജിത് ഡോവലിന് സമ്മാനിച്ച ശേഷം സംസാരിക്കവേ കേന്ദ്ര ആഭ്യന്തരമന്ത്രി അമിത് ഷാ അജിത് ഡോവലുമായി നടന്ന ആദ്യ കൂടിക്കാഴ്ചയുടെ അനുഭവങ്ങളും പങ്കുവെച്ചു.
ഗുജറാത്തിലെ മുഖ്യമന്ത്രിയായിരുന്നു നരേന്ദ്രമോദി. ഗുജറാത്തിലെ അഹമ്മദാബാദ് സ്ഫോടനത്തിന് പിന്നാലെ രാജ്യത്ത് 13 ബോംബ് സ്ഫോടനങ്ങള് ഉണ്ടായി. രാജ്യത്തെ മുഴുവന് ബോംബ് സ്ഫോടനങ്ങളും ഗുജറാത്ത് പൊലീസ് അന്വേഷിക്കണമെന്നും ഇതിനായി അജിത് ഡോവലിനെ വിളിച്ച് ചര്ച്ച ചെയ്യാന് മോദി അമിത് ഷായോട് ആവശ്യപ്പെട്ടു.
“പിറ്റേന്ന് ഒരു ഉച്ചസമയത്ത് അജിത് ഡോവല് എന്റെ വീട്ടിലെത്തി. അന്ന് അജിത് ഡോവല് അഹമ്മദാബാദിലെ സ്ഫോടനത്തെക്കുറിച്ചും രാജ്യത്ത് ഉടനീളമുണ്ടായ മറ്റ് ബോംബ് സ്ഫോടനങ്ങളെക്കുറിച്ചും വിവരിച്ചു. ഇതോടെ അന്വേഷണം എളുപ്പമായി. അജിത് ഡോവലിലൂടെ എല്ലാ സ്ഫോടനങ്ങളും സംബന്ധിച്ചുള്ള വിവരങ്ങള് അറിയാന് സാധിച്ചു. അതോടെ ഒറ്റയടിക്ക് ബോംബ് സ്ഫോടനപരമ്പര നിര്ത്താനായി”- അജിത് ഡോവല് പറഞ്ഞു.
2014ല് രാജ്യത്തെ പ്രധാനമന്ത്രിയായ നരേന്ദ്രമോദി ചുമതലയേറ്റപ്പോള് ആദ്യം എടുത്ത തീരുമാനം അജിത് ഡോവലിനെ ദേശീയ സുരക്ഷാ ഉപദേഷ്ടാവായി നിയമിച്ചുകൊണ്ടുള്ള ഉത്തരവായിരുന്നുവെന്നും അമിത് ഷാ പറഞ്ഞു. പ്രധാനമന്ത്രി നരേന്ദ്രമോദിയുടെ നേതൃത്വത്തിലും അജിത് ഡോവലിന്റെ പ്രവര്ത്തനമികവിലും ഇന്ത്യയുടെ വിദേശ നയം ഉരുക്കുനട്ടെല്ലില് തീര്ത്ത നയമായി മാറിയെന്നും അമിത് ഷാ പറഞ്ഞു.
