മുംബൈ: റിലയന്‍സ് കാപിറ്റല്‍ ലിമിറ്റഡ് (ആര്‍സിഎല്‍) മുന്‍ ചെയര്‍മാന്‍ അനില്‍ അംബാനിക്കെതിരെ വഞ്ചനാക്കുറ്റം ചുമത്തി സിബിഐ കേസെടുത്തു. അനില്‍ അംബാനിയും ചില പൊതുപ്രവര്‍ത്തകരും ചേര്‍ന്ന് എംപ്ലോയീസ് പ്രൊവിഡന്റ് ഫണ്ട് ഓര്‍ഗനൈസേഷന് (ഇപിഎഫ്ഒ) 1816 കോടി രൂപയുടെ നഷ്ടം ഉണ്ടാക്കിയെന്നാണ് കേസിനാസ്പദമായ ആരോപണം.
2013-14 കാലഘട്ടത്തില്‍ ആര്‍സിഎല്ലിന്റെ സുരക്ഷിതമായ നോണ്‍ കണ്‍വെര്‍ട്ടബിള്‍ ഡിബെഞ്ചറുകളില്‍ ഇപിഎഫ്ഒ 2500 കോടി രൂപ നിക്ഷേപിച്ചിരുന്നു. എന്നാല്‍ കമ്പനിക്ക് ലഭിക്കേണ്ട തിരിച്ചടവ് പിന്നീട് മുടങ്ങി. തൊഴിലാളികളുടെ പ്രൊവിഡന്‍സ് ഫണ്ട്, പെന്‍ഷന്‍ സ്‌കീം, മറ്റ് ഇന്‍ഷുറന്‍സ് സ്‌കീമുകള്‍ എന്നിവ കൈകാര്യം ചെയ്യുന്നത് ഇപിഎഫ്ഒ ആണ്. സെന്‍ട്രല്‍ ബോര്‍ഡ് ഓഫ് ട്രസ്റ്റീസാണ് ഇതിന്റെ ഭരണനിര്‍വ്വഹണം നിര്‍വഹിക്കുന്നത്.
2019-ല്‍ ആര്‍സിഎല്ലിന്റെ സാമ്പത്തിക സ്ഥിതി മോശമാവുകയും കമ്പനി കോര്‍പ്പറേറ്റ് പാപ്പരത്വ പരിഹാര നടപടി ക്രമങ്ങളിലേക്ക് കടക്കുകയും ചെയ്തതോടെയാണ് പ്രതിസന്ധി രൂക്ഷമായത്. തുടര്‍ന്ന് ബന്ധപ്പെട്ട അധികൃതര്‍ക്ക് മുമ്പില്‍ ഇപിഎഫ്ഒ പരാതി നല്‍കി. നാഷണല്‍ കമ്പനി ലോ ട്രൈബ്യൂണലിന് മുമ്പില്‍ വിഷയം എത്തിയതിനെ തുടര്‍ന്ന് ഒത്തുതീര്‍പ്പ് നടപടികളിലൂടെ 1492 കോടി രൂപ ഇപിഎഫ്ഒയ്ക്ക് തിരികെ ലഭിച്ചിരുന്നു. എങ്കിലും, ബാക്കിയുള്ള 1007 കോടി രൂപയും ഇതിന്റെ പലിശയായ 809 കോടി രൂപയുമുള്‍പ്പെടെയാണ് 1816 കോടി രൂപയുടെ നഷ്ടമുണ്ടായതായി കണക്കാക്കുന്നത്.
അടുത്തിടെ ആര്‍സിഎല്ലിന്റെ ഇടപാടുകളിലെ ക്രമക്കേടുകളെക്കുറിച്ചുള്ള കണ്ടെത്തലുകള്‍ എന്‍ഫോഴ്സ്മെന്റ് ഡയറക്ടറേറ്റ് പുറത്തുവിട്ടിരുന്നു. ഇതിന് പിന്നാലെയാണ് ഇപിഎഫ്ഒ റിലയന്‍സിനെതിരെ സിബിഐയെ സമീപിച്ചതും അന്വേഷണം ആരംഭിച്ചതും. സംഭവത്തില്‍ ഇഡിയും പ്രത്യേകമായി ഒരു കേസ് രജിസ്റ്റര്‍ ചെയ്തിട്ടുണ്ട്.
