വിശാഖപട്ടണം: ആന്ധ്രാപ്രദേശിന്റെ വികസന ചരിത്രത്തിലേക്ക് പുതിയൊരു നാഴികക്കല്ല് കൂടി സമ്മാനിച്ച് പ്രധാനമന്ത്രി നരേന്ദ്ര മോദി. വിജയനഗരം ജില്ലയിലെ ഭോഗപുരത്ത് നിര്മിച്ച അല്ലൂരി സീതാരാമ രാജു വിമാനത്താവളം പ്രധാനമന്ത്രി ഉദ്ഘാടനം ചെയ്തു.
സ്വാതന്ത്യസമര സേനാനി അല്ലൂരി സീതാരാമ രാജുവിന്റെ പേരിലുള്ള വിമാനത്താവളം ഭാരത പൈതൃകത്തിലുള്ള അഭിമാനത്തെ പ്രതിഫലിപ്പിക്കുന്നുവെന്ന് പ്രധാനമന്ത്രി മോദി സമൂഹമാധ്യമത്തില് കുറിച്ചു. വിമാനത്താവളം ഉദ്ഘാടനം ചെയ്യുന്നതിന് ഒപ്പം ഏകദേശം 17,900 കോടിയിലധികം രൂപയുടെ വികസന പദ്ധതികളും മോദി ആന്ധ്രാപ്രദേശിന് സമ്മാനിച്ചു. സെമികണ്ടക്ടര് നിര്മാണ രംഗത്ത് സംസ്ഥാനത്തിന്റെ സ്ഥാനം ഉറപ്പാക്കുന്നതിനായി സെമികണ്ടക്ടര് നിര്മാണ യൂണിറ്റ്, 5,550 കോടി രൂപയുടെ കര്ണൂല്-കഢ പുനരുപയോഗ ഊര്ജ മേഖല ട്രാന്സ്മിഷന് സിസ്റ്റം, അടിസ്ഥാനസൗകര്യം ശക്തിപ്പെടുത്തുന്ന 1,880 കോടിയിലധികം രൂപയുടെ ദേശീയപാത പദ്ധതികള് എന്നിവയാണ് പുതിയ വികസന ലക്ഷ്യങ്ങള്.
”ആന്ധ്രാപ്രദേശിന്റെ കണക്റ്റിവിറ്റിയും വികസനവും ശക്തിപ്പെടുത്തുന്ന ചരിത്ര പദ്ധതിയാണിത്… ടൂറിസം, വാണിജ്യം, നിക്ഷേപം, തൊഴില് എന്നിവയ്ക്ക് ഇത് ഉത്തേജനം നല്കും. ഇവിടുത്തെ ടെര്മിനല് കെട്ടിടം ആന്ധ്രാപ്രദേശിന്റെ സാംസ്കാരിക സ്വത്വത്തെ പ്രതിഫലിപ്പിക്കുന്നു,” വിമാനത്താവളത്തിന്റെ ഉദ്ഘാടനം നിര്വഹിച്ചുകൊണ്ട് പ്രധാനമന്ത്രി പറഞ്ഞു. ഉദ്ഘാടനത്തിന് പിന്നാലെ പ്രധാനമന്ത്രി വിമാനത്താവളത്തിലെ അത്യാധുനിക പാസഞ്ചര് ടെര്മിനല് സന്ദര്ശിച്ച് വിവിധ സംവിധാനങ്ങള് വിലയിരുത്തി.
5,640 കോടിയിലധികം രൂപയുടെ പദ്ധതിയായ വിമാനത്താവളം വെറും 31 മാസങ്ങള്ക്കുള്ളിലാണ് പൂര്ത്തിയാക്കിയത്. പൊതുമേഖല-സ്വകാര്യ പങ്കാളിത്ത (പിപിപി) മാതൃകയില് നിര്മിച്ച അത്യാധുനിക ഗ്രീന്ഫീല്ഡ് അന്താരാഷ്ട്ര വിമാനത്താവളത്തിന് പ്രതിവര്ഷം 60 ലക്ഷം യാത്രക്കാരെ കൈകാര്യം ചെയ്യാനുള്ള ശേഷിയുണ്ട്.
ആന്ധ്രാപ്രദേശ് ഗവര്ണര് സയ്യിദ് അബ്ദുള് നസീര്, മുഖ്യമന്ത്രി എന്. ചന്ദ്രബാബു നായിഡു, ഉപമുഖ്യമന്ത്രി പവന് കല്യാണ്, കേന്ദ്ര സിവില് വ്യോമയാന മന്ത്രി കെ. റാം മോഹന് നായിഡു എന്നിവരും ഉദ്ഘാടന ചടങ്ങില് പങ്കെടുത്തു. ആന്ധ്രാ മുഖ്യമന്ത്രി ചന്ദ്രബാബു നായിഡു സമൂഹമാധ്യമത്തില് പങ്കുവെച്ച വിമാനത്താവളത്തിലേക്ക് വിരല് ചൂണ്ടിക്കൊണ്ടുള്ള ചിത്രത്തില് ‘ഭാവി’ എന്നാണ് അദ്ദേഹം വിശേഷിപ്പിച്ചിരിക്കുന്നത്. ‘ഭാവി? അതെ… അത് അങ്ങനെയാണ്!’ അദ്ദേഹം എക്സില് കുറിച്ചു.
ആന്ധ്രാപ്രദേശിലെ പരിപാടികള്ക്ക് ശേഷം പ്രധാനമന്ത്രി കര്ണാടകയിലെ മൈസൂരിലുള്ള ശ്രീരാമകൃഷ്ണ ആശ്രമത്തില് സംഘടിപ്പിക്കുന്ന സ്വാമി വിവേകാനന്ദ സാംസ്കാരിക കേന്ദ്രമായ ‘വിവേക സ്മാരക്’ ഉദ്ഘാടനം ചെയ്തു. കര്ണാടക മുഖ്യമന്ത്രി ഡി.കെ. ശിവകുമാറുമായും കൂടിക്കാഴ്ച നടത്തി.
