പോലീസുകാരും മനുഷ്യരാണ്; അവര്‍ക്കും കുടുംബമുണ്ട്…; കോക്രോച്ച് പാര്‍ട്ടിയുടെ അക്രമ സമരത്തില്‍ പരിക്കേറ്റ പോലീസുകാരുടെ കുടുംബാംഗങ്ങള്‍

ന്യൂദല്‍ഹി: ”യൂണിഫോമിന് പിന്നില്‍ പോലീസ് ഉദ്യോഗസ്ഥന്‍ മാത്രമല്ല ഉള്ളത്. ഭാര്യയും കുട്ടികളും മാതാപിതാക്കളും ഉള്‍പ്പെടുന്ന വലിയ കുടുംബമുണ്ട്. ആ രാത്രിയില്‍ ഞങ്ങള്‍ അനുഭവിച്ച സങ്കടം കൂടി എല്ലാവരും മനസിലാക്കണം. പരിക്കേറ്റ പോലീസുകാരുടെയും കുടുംബങ്ങളുടെയും വേദനകൂടി പാര്‍ലമെന്റില്‍ ചര്‍ച്ച ചെയ്യണം. അവരും മനുഷ്യരാണ്” കോക്രോച്ച് പാര്‍ട്ടിയുടെ അക്രമ സമരത്തില്‍ പരിക്കേറ്റ പോലീസുകാരുടെ കുടുംബാംഗങ്ങള്‍ കണ്ണീരോടെ ആവശ്യപ്പെട്ടു. സമരത്തിന്റെ യഥാര്‍ത്ഥമുഖം വ്യക്തമാക്കി ഗുരുതരമായി പരിക്കേറ്റ പോലീസുകാര്‍ രക്തത്തില്‍ കുളിച്ച് നില്‍ക്കുന്ന ചിത്രങ്ങള്‍ സഹിതമാണ് അവര്‍ വാര്‍ത്താസമ്മേളനം നടത്തിയത്.

രക്തത്തില്‍ കുതിര്‍ന്ന യൂണിഫോമില്‍ ഭര്‍ത്താവിനെ വീട്ടിലേക്ക് എത്തിക്കുന്നത് കണ്ട രണ്ടുവയസുള്ള മകളും താനും അനുഭവിച്ച വേദനയായിരുന്നു പരിക്കേറ്റ എസിപിയുടെ ഭാര്യ ഉപ്നീത് കൗറിന്റെ വാക്കുകളില്‍. അന്നത്തെ ആ വേദന ജനങ്ങളും മനസിലാക്കണമെന്നാണ് ആഗ്രഹം. പോലീസുകാര്‍ക്കേറ്റ പരിക്കുകളെ അവഗണിച്ചുള്ള സോഷ്യല്‍ മീഡിയ പ്രചാരണങ്ങളല്ല യാഥാര്‍ത്ഥ്യം.. തന്നോട് സംസാരിച്ച് നിമിഷങ്ങള്‍ക്കുള്ളില്‍ ഭര്‍ത്താവ് ഗുരുതര പരിക്കേറ്റ് എല്‍എന്‍ജെപി ആശുപത്രിയില്‍ ചികിത്സയിലാണെന്നുള്ള ഫോണ്‍കോള്‍ വന്നതിന്റെ ആഘാതത്തില്‍ നിന്ന് എഎസ്ഐയുടെ ഭാര്യ സീമ ഇതുവരെ മോചിതയായിട്ടില്ല. രാത്രി 11 മണിയോടെ തകര്‍ന്ന ഹെല്‍മെറ്റുമായി വീട്ടിലെത്തിയ ഭര്‍ത്താവിന്റെ രൂപം ഓര്‍ക്കുമ്പോള്‍ ഇപ്പോഴും ഭയമാണെന്നും ഹെല്‍മെറ്റ് തകര്‍ന്നതിന് ശേഷം തലയില്‍ വീണ്ടും കല്ലേറേറ്റിരുന്നെങ്കില്‍ അദ്ദേഹം ജീവനോടെയുണ്ടാകുമായിരുന്നില്ലെന്നും സീമ പറഞ്ഞു.

തന്റെ അച്ഛനെ ജന്തര്‍ മന്തറിലെ സ്റ്റേജിന് സമീപത്തുവെച്ച് വലിച്ചിഴച്ച് കൊണ്ടുപോയി ആള്‍ക്കൂട്ട ആക്രമണത്തിന് ഇരയാക്കിയതിന്റേയും നാല് മണിക്കൂറോളം ആര്‍എംഎല്‍ ആശുപത്രിയില്‍ ബോധരഹിതനായി കിടക്കേണ്ടിവന്നതിന്റെയും നേര്‍സാക്ഷ്യമായിരുന്നു കുഞ്ചല്‍ വിവരിച്ചത്. തലമുടി മൊട്ടയടിച്ച് തുന്നലുകളിട്ട തലയുമായി എത്തിയ അച്ഛന്റെ വേദനയെ കുറിച്ചായിരുന്നു ലക്ഷ്യ സിങ്ങിന് പറയാനുണ്ടായിരുന്നത്.

രക്തം വാര്‍ന്നൊഴുകുന്ന പോലീസ് ഉദ്യോഗസ്ഥരുടെ ചിത്രങ്ങള്‍ക്കൊപ്പം അക്രമത്തിന്റെ കണക്കുകളും കുടുംബാംഗങ്ങള്‍ പുറത്തുവിട്ടു. കോക്രോച്ച് അക്രമത്തില്‍ 250ലധികം പോലീസ് ഉദ്യോഗസ്ഥര്‍ക്ക് പരിക്കേറ്റു. 110ലധികം ബാരിക്കേഡുകള്‍, 300 ബോഡി പ്രൊട്ടക്ടറുകള്‍, 350 ഹെല്‍മെറ്റുകള്‍, 20 ലൗഡ് ഹെയ്‌ലറുകള്‍, 10 ഹാന്‍ഡ്‌ഹെല്‍ഡ് മെറ്റല്‍ ഡിറ്റക്ടറുകള്‍, ഒരു എക്‌സ്‌റേ ബാഗേജ് സ്‌കാനര്‍, 25ലധികം സര്‍ക്കാര്‍ വാഹനങ്ങള്‍ എന്നിവയും സ്വകാര്യ സ്വത്തുക്കളും തകര്‍ക്കപ്പെട്ടു. എല്ലാവരും പോലീസ് ആക്രമിച്ചെന്നാണ് പറയുന്നത്. അക്രമം തുടങ്ങിയത് സമരക്കാരാണ്. പരിക്കേറ്റ പോലീസ് ഉദ്യോഗസ്ഥരെക്കുറിച്ച് പാര്‍ലമെന്റിലുള്‍പ്പെടെ ചര്‍ച്ച വേണം, അവര്‍ പറഞ്ഞു.