ഗുവാഹത്തി: ആസാമില് പ്രളയക്കെടുതി തുടരുന്നതിനിടെ മരണം 78 ആയി ഉയര്ന്നു. കഴിഞ്ഞ 24 മണിക്കൂറിനിടെ സിവാസാഗറില് രണ്ട് പേരും ഗോലാഘട്ടില് ഒരാളും മരിച്ചതോടെയാണ് മരണസംഖ്യ ഉയര്ന്നത്.
പ്രളയജലം ചില മേഖലകളില് ഇറങ്ങിത്തുടങ്ങിയെങ്കിലും ഏഴ് ജില്ലകളിലായി 3,00,031 പേര് ഇപ്പോഴും ദുരിതബാധിതരാണ്. ചരൈദേവ് ജില്ലയിലാണ് ഏറ്റവും കൂടുതല് ആളുകള് ദുരിതത്തിലായത്, 1,37,561 പേര്.
സിവാസാഗറില് 84,600 പേരും ജോര്ഹട്ടില് 49,911 പേരും പ്രളയബാധിതരായിട്ടുണ്ട്. ആസാം, അരുണാചല് പ്രദേശ്, നാഗാലാന്ഡ് എന്നിവിടങ്ങളില് അടുത്ത മൂന്ന് ദിവസങ്ങളില് കനത്തതോ അതിശക്തമായതോ ആയ മഴയ്ക്ക് കേന്ദ്ര കാലാവസ്ഥാ വകുപ്പ് മുന്നറിയിപ്പ് നല്കിയിട്ടുണ്ട്. ഒറ്റപ്പെട്ട സ്ഥലങ്ങളില് ഇടിമിന്നലിനും സാധ്യതയുണ്ട്.
പ്രളയത്തെ തുടര്ന്ന് 16,500ലേറെ പേരെ 71 ദുരിതാശ്വാസ ക്യാമ്പുകളിലായി മാറ്റിപ്പാര്പ്പിച്ചിട്ടുണ്ട്. 30 സഹായ വിതരണ കേന്ദ്രങ്ങളിലൂടെ 72,000ത്തിലേറെ പേര്ക്ക് സഹായം ലഭിക്കുന്നുണ്ട്.
