ന്യൂദല്‍ഹി: ഭാരതത്തിലെ ആദ്യ ടെലികോം മാനുഫാക്ചറിങ് സോണ്‍ (ടിഎംസെഡ്) മധ്യപ്രദേശിലെ ഗ്വാളിയോറില്‍ സ്ഥാപിക്കും. കേന്ദ്ര ടെലികമ്മ്യൂണിക്കേഷന്‍ വകുപ്പും മധ്യപ്രദേശ് സര്‍ക്കാരിന്റെ വ്യവസായ നയ-നിക്ഷേപ പ്രോത്സാഹനവകുപ്പും ധാരണാപത്രത്തില്‍ ഒപ്പുവെച്ചു.
കേന്ദ്ര ടെലികമ്മ്യൂണിക്കേഷന്‍സ് വകുപ്പ് മന്ത്രി ജ്യോതിരാദിത്യ സിന്ധ്യ, മധ്യപ്രദേശ് മുഖ്യമന്ത്രി ഡോ. മോഹന്‍ യാദവ് തുടങ്ങിയവരുടെ സാന്നിധ്യത്തില്‍ വിജ്ഞാന്‍ ഭവനിലെ ചടങ്ങില്‍ ധാരണാപത്രം കൈമാറി. പദ്ധതിയുടെ ആദ്യ ഘട്ടത്തില്‍ അടിസ്ഥാന സൗകര്യങ്ങള്‍ ഒരുക്കുന്നതിനായി 500 കോടി രൂപ കേന്ദ്രസര്‍ക്കാര്‍ നിക്ഷേപിക്കും.
350 ഏക്കറില്‍ സ്ഥാപിക്കുന്ന ടെലികോം മാനുഫാക്ചറിങ് സോണിലൂടെ 3,500 കോടി രൂപ വരെ നിക്ഷേപം പ്രതീക്ഷിക്കുന്നു. 14,000 ത്തിലധികം തൊഴിലവസരങ്ങളും സൃഷ്ടിക്കും. രാജ്യത്തെ ആദ്യത്തെ ടെലികോം നിര്‍മാണ മേഖല, ടെലികോം ഉത്പന്നങ്ങളുടെ നിര്‍മാണത്തിനായി ലോകോത്തര നിലവാരമുള്ള ഒരു വ്യവസായ അന്തരീക്ഷം സൃഷ്ടിക്കും. മൊബൈല്‍ ഫോണുകള്‍, നെറ്റ്‌വര്‍ക്ക് ഉപകരണങ്ങള്‍, ഫൈബര്‍ ഒപ്റ്റിക്സ്, സെമികണ്ടക്ടറുകള്‍, 5ജി, 6ജി സാങ്കേതിക വിദ്യകള്‍ എന്നിവയുടെ ഗവേഷണം, രൂപകല്‍പ്പന, പരിശോധന, നിര്‍മാണം എന്നിവയ്‌ക്കുള്ള അത്യാധുനിക സൗകര്യങ്ങള്‍ ഈ സംയോജിത കാമ്പസില്‍ ഒരുക്കും.
