ചെന്നൈ: വിപണിയിലെത്തിക്കുന്നതിനു തൊട്ടുമുന്പുവരെ ബ്രോയിലര് കോഴികളുടെ ഭാരം കൃത്രിമമായി വര്ദ്ധിപ്പിക്കുന്നതിനായി ഉത്പാദകര് അവയ്ക്ക് ഭക്ഷണം നല്കാറുണ്ടെന്ന് വ്യാപാരികള്. ഇതുമൂലം വാങ്ങുന്ന സമയത്ത് 100 മുതല് 200 ഗ്രാം വരെ ദഹിക്കാത്ത തീറ്റയും വെള്ളവും കോഴിയുടെ വയറ്റില് ശേഷിക്കും. ഇത് ദഹനം മോശമാകുന്നതിനും തീറ്റ കരളിലും തൊണ്ടയിലും കുടുങ്ങിക്കിടക്കുന്നതിനും കാരണമാകും. കോഴിയെ ഡ്രസ്സു ചെയ്യുമ്പോള് ഈ തീറ്റയും മാലിന്യവും ഒഴുകിച്ചേര്ന്ന് മാംസം മലിനമാകുകയും ചെയ്യുമെന്നാണ് തമിഴ് നാട് പൗള്ട്രി ട്രേഡേഴ്സ് ഫെഡറേഷന് സംസ്ഥാന പ്രസിഡന്റ് ദുരൈരാജ് പറയുന്നത്. കൊല്ലുന്നതിന് 8-12 മണിക്കൂര് മുമ്പ് ബ്രോയിലര് കോഴിക്ക് തീറ്റ നല്കരുതെന്നാണ് സര്ക്കാര് മാനദണ്ഡം. ഈ നിയമം പാലിക്കപ്പെടുന്നില്ല. ‘ട്രക്കുകളില് കയറ്റുന്നതുവരെ ആവര്ത്തിച്ച് ഭക്ഷണം നല്കുന്നതുവഴി ഒരു കോഴിക്ക് കുറഞ്ഞത് 100 ഗ്രാം ഭാരം വര്ദ്ധിക്കും. അധിക തീറ്റയ്ക്ക് 3 രൂപ മുതല് 4 രൂപ വരെ മാത്രം വില വരുമ്പോള്, 10 മുതല് 12 രൂപ വരെ അധികവില ലഭിക്കും. ഈ വിലവര്ദ്ധന മൊത്തക്കച്ചവടക്കാരെയും ചില്ലറ വ്യാപാരികളെയും ആത്യന്തികമായി ഉപഭോക്താക്കളെയുമാണ് ബാധിക്കുക.
