പത്തനംതിട്ട: ജന്മഭൂമി സംസ്കൃതി പേജില് രവീന്ദ്രവര്മ്മ അംബാനിലയം എഴുതിയ ആധ്യാത്മിക ലേഖനങ്ങള് പുസ്തകമാക്കുന്നു. മേല്വിലാസം ഇല്ലാത്തവന്റെ യാത്രകള് എന്ന പേരിലുള്ള പുസ്തകത്തിന്റെ കവര് പ്രകാശനം തപസ്യ പത്തനംതിട്ട ജില്ലാ സമ്മേളനത്തില് നടന്നു. ആറന്മുള കിഴക്കേനടയിലെ പള്ളിയോട സേവാ ഹാളില് തപസ്യ സംസ്ഥാന സംഘടനാ കാര്യദര്ശി രജിത്കുമാര്, സംസ്ഥാന ഉപാധ്യക്ഷന് പ്രസന്നകുമാര് കടമ്മനിട്ട എന്നിവര് ചേര്ന്നാണ് പ്രകാശനം നിര്വഹിച്ചത്.
വൈദിക സാഹിത്യവും ചിന്തയും സാധകര്ക്ക് അടുത്തറിയാന് ഉപകരിക്കുന്ന, മഹര്ഷിമാരായ കപിലന്റെ സാഖ്യം, കണാദന്റെ വൈശേഷികം, പതഞ്ജലിയുടെ യോഗം, ഗൗതമന്റെ ന്യായം, ജൈമിനിയുടെ പൂര്വമീമാംസ, ബാദരായണന്റെ ഉത്തരമീമാംസ എന്നീ ഷഡ്ദര്ശനങ്ങളെക്കുറിച്ചും ചിരഞ്ജീവിയായ ആഞ്ജനേയന് ഭഗവാന് ശ്രീരാമചന്ദ്രന് ഉപദേശിച്ച മോക്ഷമാര്ഗമായ ശ്രീരാമഗീത, കൊടുങ്ങല്ലൂര് ക്ഷേത്ര മാഹാത്മ്യം ഉള്പ്പെടെ വിവിധ വിഷയങ്ങള് പുസ്തകത്തിലുണ്ട്.
ഛത്രപതി ശിവജിയുടെ 352-ാം കിരീടാരോഹണ വാര്ഷികത്തോടനുബന്ധിച്ച് സപ്തംബര് 12ന് ഓമല്ലൂരില് തപസ്യ കലാ സാഹിത്യവേദിയുടെ നേതൃത്വത്തില് നടക്കുന്ന പരിപാടിയില് പുസ്തകം പ്രകാശനം ചെയ്യുമെന്ന് രവീന്ദ്രവര്മ്മ അംബാനിലയം പറഞ്ഞു.
