ആലപ്പുഴ: കുമാരപുരം സ്വദേശി വിജിത്തിന്റെ മരണത്തില് ദുരൂഹത ആരോപിച്ച് കുടുംബം. വിജിത്തിനെ തമിഴ്നാട്ടില് മരിച്ച നിലയില് കണ്ടെത്തുകയായിരുന്നു. വിജിത്തിന്റെ സുഹൃത്തായ കണ്ടല്ലൂര് സ്വദേശി ലേഖ, ഭാര്യയാണെന്ന് അവകാശപ്പെട്ട് മൃതദേഹം ഏറ്റുവാങ്ങി സംസ്കരിച്ചതാണ് ദുരൂഹത വര്ദ്ധിപ്പിക്കുന്നത്.
ഈ യുവതിക്കും അവരുടെ കൂട്ടാളിക്കും മരണത്തില് പങ്കുണ്ടെന്നാണ് വിജിത്തിന്റെ ബന്ധുക്കള് പറയുന്നത്. ബന്ധുക്കളെ അറിയിക്കാതെ മൃതദേഹം സംസ്കരിച്ചത് സംശയാസ്പദമാണ്. സംഭവത്തില് സമഗ്ര അന്വേഷണം ആവശ്യപ്പെട്ട് ആഭ്യന്തര മന്ത്രിക്ക് പരാതി നല്കുമെന്ന് വിജിത്തിന്റെ സഹോദരന് വിജീഷ് അറിയിച്ചു.
തമിഴ്നാട് കൃഷ്ണഗിരിയിലെ സ്വകാര്യ കമ്പനിയില് വെല്ഡറായി ജോലി ചെയ്തിരുന്ന വിജിത്തിനെ കഴിഞ്ഞ ഡിസംബറിലാണ് കാണാതായത്. തുടര്ന്ന് ഹരിപ്പാട് പൊലീസില് കുടുംബം പരാതി നല്കിയിരുന്നു. അന്വേഷണത്തില് വിജിത്ത് മരിച്ചതായും സുഹൃത്തായിരുന്ന ലേഖ മൃതദേഹം ഏറ്റുവാങ്ങി ചെങ്ങന്നൂര് സ്വദേശി ഗോപാലകൃഷ്ണനുമായി ചേര്ന്ന് സംസ്കരിക്കുകയുമായിരുന്നെന്ന് ബന്ധുക്കള് ആരോപിക്കുന്നു.
വിജിത്തുമായി സാമ്പത്തിക ഇടപാടുണ്ടായിരുന്ന ലേഖ നേരത്തെ വീട്ടിലെത്തി പ്രശ്നമുണ്ടാക്കിയിരുന്നതായി സഹോദരന് വിജീഷ് പറഞ്ഞു.
