മുംബൈ: അക്കൗണ്ടില് മിനിമം ബാലന്സില്ലെന്ന കാരണം പറഞ്ഞ് അക്കൗണ്ട് ഉടമകളില് നിന്നും ബാങ്ക് ഈടാക്കുന്ന ചെറിയ പിഴ വഴി സ്വകാര്യബാങ്കുകള് കഴിഞ്ഞ സാമ്പത്തിക വര്ഷം വാരിക്കൂട്ടിയത് 5000 കോടി രൂപ. 2025 ഏപ്രില്മുതല് 2026 മാര്ച്ച് വരെയുള്ള സാമ്പത്തിക വര്ഷത്തില് ആണ് ഇന്ത്യയിലെ സ്വകാര്യ ബാങ്കുകള് ഇത്രയും തുക സമ്പാദിച്ചതെന്ന് കേന്ദ്ര സര്ക്കാര് അറിയിച്ചു. മിനിമം ബാലന്സ് നിലനിര്ത്തുന്നതില് പരാജയപ്പെട്ടതിനാല് സാധാരണക്കാരുടെ സേവിംഗ്സ് അക്കൗണ്ടുകളില് നിന്നും ബിസിനസുകാരുടെ കറന്റ് അക്കൗണ്ടുകളില് നിന്നും ബാങ്കുകള് പിഴ ശേഖരിച്ചിട്ടുണ്ട്.
പാര്ലമെന്റില് ചോദ്യത്തിന് മറുപടി പറയവേയാണ് ധനകാര്യ സഹമന്ത്രി പങ്കജ് ചൗധരി ഇക്കാര്യം അറിയിച്ചത്. കൃത്യമായി പറഞ്ഞാല് സ്വകാര്യബാങ്കുകള് സമ്പാദിച്ചത് 4987 കോടി രൂപയാണെങ്കില് പൊതുമേഖലാ ബാങ്കുകള് മിനിമം ബാലന്സില്ലാത്തതിനാല് പിഴ ഈടാക്കുക വഴി കസ്റ്റമറില് നിന്നും സമ്പാദിച്ചത് 2137 കോടി രൂപയോളമാണ്. സ്വകാര്യ ബാങ്കില് എച്ച് ഡിഎഫ് സി ബാങ്കാണ് ഈ ഇനത്തില് കൂടുതല് തുക സമ്പാദിച്ചത്- 1798 കോടി രൂപ. ആക്സിസ് ബാങ്കാകട്ടെ 1081 കോടി രൂപയും സമ്പാദിച്ചു.
മിനിമം ബാലന്സ് നിലനിര്ത്താതിരുന്നാല് ചെറിയ ഒരു പിഴയാണ് ബാങ്ക് ഈടാക്കുക. എങ്കിലും നിരവധി പേര് മിനിമം ബാലന്സ് നിലനിര്ത്താത്തവരായതിനാല് അവരുടെ കയ്യില് നിന്നെല്ലാം പിഴ ഈടാക്കിയാല് അത് വലിയൊരു തുകയായി ബാങ്കിന് ലഭിക്കുകയാണ്.
