തിരുവനന്തപുരം : കേരളത്തിന് എയിംസ് അനുവദിക്കുമെന്ന് കേന്ദ്ര ആരോഗ്യമന്ത്രി ഉറപ്പ് നല്കിയതായി ആരോഗ്യമന്ത്രി കെ മുരളീധരന് അറിയിച്ചു. തിരുവനന്തപുരത്തെ രണ്ടാം മെഡിക്കല് കോളേജില് അടുത്ത അധ്യയന വര്ഷം 100 എം.ബി.ബി.എസ് സീറ്റില് പ്രവേശനം നല്കുന്ന കാര്യവും ദല്ഹിയില് നടത്തിയ ചര്ച്ചയില് കേന്ദ്രആരോഗ്യമന്ത്രി തത്വത്തില് അംഗീകരിച്ചതായി മുരളീധരന് പറഞ്ഞു. കേന്ദ്രസര്ക്കാരിന്റെ ഇന്ഷ്വറന്സിന്റെ പരിധി ഉയര്ത്തല്,സംസ്ഥാനത്തെ എല്ലാ ജില്ലകളിലും ട്രോമ കെയര് സെന്റര് എന്നീകാര്യങ്ങളില് അനുഭാവപൂര്ണ്ണമായ നടപടിയുണ്ടാകും. ഇന്ത്യയില് ആദ്യമായി ജനറ്റിക് ഇന്സ്റ്റിറ്റ്യൂട്ട് കേരളത്തില് ആരംഭിക്കുന്നതിനുള്ള പ്രൊപ്പോസല് സമര്പ്പിക്കാനും കേന്ദ്രആരോഗ്യമന്ത്രി നിര്ദേശിച്ചു.
കേരളത്തിലെ മൂന്ന് മെന്റല് ഹെല്ത്ത് സെന്ററുകളുടെ നിലവാരം ഉയര്ത്തുന്നതിനും പെണ്കുട്ടികള്ക്ക് എച്ച്.പി.വി വാക്സിന് നല്കുന്നതിനും കേന്ദ്രസഹായം ഉണ്ടാകും. എന്.എച്ച്.എം ഫണ്ട് തീരുന്ന മുറയ്ക്ക് പരിധി വര്ദ്ധിപ്പിക്കും. സാംക്രമികേതര രോഗങ്ങള്ക്കുള്ള മരുന്നുകള്, ചില ക്യാന്സര് മരുന്നുകള് എന്നിവ ലഭ്യമാക്കുന്നതിന് നടപടി സ്വീകരിക്കാമെന്ന് കേന്ദ്രമന്ത്രി ഉറപ്പു നല്കിയതായും മുരളീധരന് അറിയിച്ചു.
