ആലത്തൂര്: വെങ്ങന്നൂര് മേഖലയിലെ നെരങ്ങാംപാറ പ്രദേശത്ത് നിന്ന് ഏതാനും ദിവസങ്ങളായി മയിലുകള് സമീപ പ്രദേശങ്ങളിലെ ജനവാസ മേഖലയിലേക്ക് വ്യാപകമായി എത്തുന്നത് ആശങ്ക ഉയര്ത്തുന്നു.
ചൂലന്നൂര് മയില് സങ്കേതത്തിന്റെ ഭാഗമായ നെരങ്ങാന്പാറ പ്രദേശം മയിലുകളുടെ പ്രധാന സ്വാഭാവിക ആവാസവ്യവസ്ഥയാണ്. സമീപകാലത്ത് കൃഷിയിടങ്ങള്, വീടുകളുടെ പരിസരങ്ങള്, പൊതുവഴികള് എന്നിവിടങ്ങളില് മയിലുകള് സ്ഥിരമായി കാണപ്പെടുന്നുവെന്ന് നാട്ടുകാര് പറയുന്നു. നിരവധി പേര് ഇവയുടെ ദൃശ്യങ്ങള് സാമൂഹിക മാധ്യമങ്ങളിലൂടെ പങ്കുവെച്ചിട്ടുണ്ട്.
വന്യജീവികള് സ്വാഭാവിക ആവാസവ്യവസ്ഥ വിട്ട് ജനവാസ മേഖലയിലേക്ക് എത്തുന്നത് ഗൗരവമായി കാണേണ്ടതാണെന്ന് പരിസ്ഥിതി പ്രവര്ത്തകര് പറഞ്ഞു.
ആവാസവ്യവസ്ഥയിലെ മാറ്റങ്ങള്, മനുഷ്യ ഇടപെടലുകളുടെ വര്ധന, ഖനന-ക്വാറി പ്രവര്ത്തനങ്ങള്, സ്ഫോടനങ്ങളില് നിന്നുള്ള പ്രകമ്പനങ്ങളും ശബ്ദ മലിനീകരണവും, ഭക്ഷണ ലഭ്യതയിലെ മാറ്റം, മറ്റ് പരിസ്ഥിതി സമ്മര്ദ്ദങ്ങള് എന്നിവയെല്ലാം ഇത്തരം മാറ്റങ്ങള്ക്ക് കാരണമാകുന്നുണ്ടോയെന്ന് ശാസ്ത്രീയ പഠനം നടത്തേണ്ടെന്നും അവര് കൂട്ടിചേര്ത്തു.
ചൂലന്നൂര് മയില് സങ്കേതത്തിന്റെ സ്വാധീന മേഖലയിലുള്ള പ്രദേശങ്ങളില് നടക്കുന്ന പാറ ഖനന പ്രവര്ത്തനങ്ങള് മയിലുകളുടെയും മറ്റ് വന്യജീവികളുടെയും സ്വാഭാവിക ആവാസവ്യവസ്ഥയെ പ്രതികൂലമായി ബാധിക്കുന്നുണ്ടോയെന്ന് ബന്ധപ്പെട്ട വകുപ്പുകള് അടിയന്തരമായി അന്വേഷിക്കണമെന്ന് നാട്ടുകാര് ആവശ്യപ്പെട്ടു.
ദേശീയ പക്ഷിയായ മയിലിനെ സംരക്ഷിക്കുക എന്നത് എല്ലാവരുടെയും ഉത്തരവാദിത്തമാണ്. അതിനാല് മയിലുകളെ ഉപദ്രവിക്കുകയോ അവയുടെ സഞ്ചാരത്തിന് തടസ്സം സൃഷ്ടിക്കുകയോ ചെയ്യാതെ, ജനവാസ മേഖലയിലേക്ക് എത്താന് കാരണമായ പരിസ്ഥിതി ഘടകങ്ങള് കണ്ടെത്തി സ്വാഭാവിക ആവാസവ്യവസ്ഥ സംരക്ഷിക്കുന്നതിന് അടിയന്തര നടപടികള് സ്വീകരിക്കണമെന്ന് പരിസ്ഥിതി സ്നേഹികളും പ്രദേശവാസികളും ആവശ്യപ്പെട്ടു.
