പാലക്കാട്: മനുഷ്യരുമായുള്ള ഹൃദയബന്ധമാണ് പൊതുപ്രവര്ത്തകരുടെ അടിസ്ഥാന മാനദണ്ഡമെന്നും ഇതു നഷ്ടപ്പെട്ടാല് സാമൂഹിക പരിവര്ത്തനം സാധ്യമാകില്ലെന്നും ഗോവ മുന് ഗവര്ണര് അഡ്വ. പി.എസ്.ശ്രീധരന്പിള്ള. വടക്കന്തറ, കൃഷ്ണകൃപ ഓഡിറ്റോറിയത്തില് നടന്ന ബിപിഇഎഫ് സംസ്ഥാന സമ്മേളനത്തോടനുബന്ധിച്ചുള്ള സാംസ്കാരിക സമ്മേളനത്തില് ‘രാഷ്ട്ര പുനര്നിര്മാണത്തില് പൊതുസേവകര്ക്കുള്ള പങ്ക്’ എന്ന വിഷയത്തില് മുഖ്യപ്രഭാഷണം നടത്തുകയായിരുന്നു അദ്ദേഹം. യു. കൃഷ്ണകുമാര് അധ്യക്ഷത വഹിച്ചു.
പൊതുപ്രവര്ത്തകരെ സംബന്ധിച്ചിടത്തോളം വികാരമല്ല അവരെ നയിക്കേണ്ടത് മറിച്ച് വിചാരമാണ്. വെളിച്ചമേ നയിച്ചാലും എന്ന ഭാരതത്തിന്റെ സംസ്കൃതിയാണ് അടിസ്ഥാന പാഠമാക്കേണ്ടത്. മുഷ്ടിചുരുട്ടി മുദ്രാവാക്യം വിളിക്കുമ്പോഴും അതിനെ ഹൃദയത്തില് സന്നിവേശിപ്പിക്കാന് കഴിയണം. എന്നാല് ഇന്ന് പ്രചാരണരീതികള് വലിയ വെല്ലുവിളികളാണ് ഉയര്ത്തുന്നത്. ധനധാരാളിത്തവും സോഷ്യല്മീഡിയ പ്രചരണവുമാണ് പൊതുപ്രവര്ത്തന മാനദണ്ഡമെന്ന് പലരും കരുതുന്നു. എന്നാലിത് അപകടകരമായ സ്ഥിതി വിശേഷമാണ് ഉണ്ടാക്കുക. ആധുനിക സാങ്കേതിക വിദ്യകള് ശരിയായ രീതിയില് പ്രയോജനപ്പെടുത്തിയില്ലെങ്കില് പൊതുപ്രവര്ത്തകന് ഓര്മ നഷ്ടപ്പെടുമെന്ന കാര്യം മറക്കരുതെന്ന് ശ്രീധരന്പിള്ള ഓര്മിപ്പിച്ചു.
കൊടുംഭീകരരും ക്രിമിനലുകളും രാജ്യത്തെ അലോസരപ്പെടുത്താന് ശ്രമിക്കുകയാണ്. നാടിന്റെ നന്മയല്ല അവരുടെ ലക്ഷ്യം. രാജ്യത്തെ തകര്ക്കുക എന്നതാണ് അവരുടെ ആത്യന്തികമായ നീക്കം. കഴിഞ്ഞ ദിവസങ്ങളില് ദല്ഹിയിലുണ്ടായ സംഭവങ്ങള് കേന്ദ്രസര്ക്കാരിനെ അലോസരപ്പെടുത്തുവാനുള്ള നീക്കമാണ്. സാമ്പത്തിക രംഗത്ത് രാജ്യം കുതിച്ചുകയറുകയും ബ്രിട്ടനെയും ജപ്പാനെയും പിന്നിലാക്കി ഭാരതം മുന്നേറുന്നതിനെ തകര്ക്കുകയെന്ന ആസൂത്രിത നീക്കമാണ് ദല്ഹിയിലുണ്ടായ കലാപത്തിന് പിന്നില്. അതിനാല് പൊതുപ്രവര്ത്തകര് ഏറ്റവും അധികം ജാഗ്രതപുലര്ത്തേണ്ട സന്ദര്ഭമാണിതെന്നും ശ്രീധരന്പിള്ള ഓര്മിപ്പിച്ചു. ബിപിഇഎഫ് അഖിലേന്ത്യ ഡെപ്യൂട്ടി ജനറല് സെക്രട്ടറി വെങ്കയ്യ മുഖ്യപ്രഭാഷണം നടത്തി.
ബിപിഇഎഫ് സതേണ് റീജിയണ് കണ്വീനര് എസ്.എസ്. സജിത്ത്, ബിപിഇഎ ഗ്രൂപ്പ് സി അസി. സെക്രട്ടറി. ജി. പ്രശാന്ത് സംസാരിച്ചു. തുടര്ന്ന് നടന്ന സംഘടനാ സമ്മേളനത്തില് ബിജിഡികെഎസ് സര്ക്കിള് പ്രസിഡന്റ് ഗിരീശന് അധ്യക്ഷത വഹിച്ചു. കാര്ഗില് പോരാളികള്ക്ക് ആദരാഞ്ജലി അര്പ്പിച്ചാണ് സാംസ്കാരിക സമ്മേളനം തുടങ്ങിയത്.
