ഹരാരെ: സിംബാബ്വെ പര്യടനത്തിനെത്തിയ ഭാരത ക്രിക്കറ്റ് ടീമിന് ഇന്ന് രണ്ടാം ട്വന്റി20 പരീക്ഷണം. വൈകീട്ട് 4.30ന് ഹരാരെ സ്പോര്ട്സ് ക്ലബ്ബ് സ്റ്റേഡിയത്തിലാണ് മത്സരം. മൂന്ന് മത്സര പരമ്പരയില് ആദ്യ കളി ജയിച്ചു നില്ക്കുന്ന ഭാരതത്തിന് ഇന്ന് ജയിച്ചാല് പരമ്പര സ്വന്തമാക്കാം.
ആദ്യ മത്സരത്തില് ആധികാരിക വിജയം നേടാനായതിന്റെ ആശ്വാസത്തിലാണ് ശ്രേയസ് അയ്യര്ക്ക് കീഴിലുള്ള ഭാരത ടീം. കഴിഞ്ഞ മാര്ച്ചില് ട്വന്റി20 ലോകകപ്പില് തുടര്ച്ചയായി ജേതാക്കളായതിന് പിന്നാലെ തുടരെ ഏഴ് മത്സരങ്ങളില് പരാജയപ്പെട്ട് നില്ക്കെയാണ് സിംബാബ്വെയ്ക്കെതിരായ പരമ്പരയിലൂടെ കഴിഞ്ഞ മത്സരത്തില് ജയം രുചിച്ചത്. മത്സരത്തില് അര്ദ്ധ സെഞ്ചുറി നേടിക്കൊണ്ട് വൈഭവ് സൂര്യവംശി അപൂര്വ്വ നേട്ടം കൊയ്തു. ട്വന്റി20യില് ഏറ്റവും ചെറിയ പ്രായത്തില് അര്ദ്ധ സെഞ്ചുറി നേടുന്ന താരമാകാന് വൈഭവിന് സാധിച്ചു.
ആദ്യ മത്സരത്തില് ഭാരതത്തിന്റെ വിജയം ഏഴ് വിക്കറ്റിനായിരുന്നു. പരമ്പരയിലെ മൂന്നാമത്തെയും അവസാനത്തെയും മത്സരം നാളെ വൈകീട്ട് 4.30ന് നടക്കും. കഴിഞ്ഞ കളിയില് മിന്നും വിജയം നേടിയതിനാല് അന്നത്തെ ടീമില് നിന്നും വലിയ മാറ്റങ്ങളില്ലാതെയായിരിക്കും ഭാരത ടീം ഇറങ്ങുക.
