ലോകത്തിലെ ഏറ്റവും പൗരാണിക പുണ്യനഗരിയായ വാരാണസിയിലെ അതീവ പ്രാധാന്യമുള്ള ഇടമാണ് ‘തുളസി മാനസ് മന്ദിര്’. ഗോസ്വാമി തുളസിദാസിന്റെ ‘രാമചരിതമാനസ്’ എന്ന കൃതിയുടെ കൈയെഴുത്തു പ്രതി ഇവിടെ സൂക്ഷിച്ചിരിക്കുന്നു എന്നതാണ് ഈ പുണ്യധാമത്തെ സവിശേഷമാക്കുന്നത്. കൈയെഴുത്തുപ്രതി കാണുന്നതിന് നിയന്ത്രണങ്ങളുണ്ട്; പരമ്പരാഗതമായ രീതികളാണ് ഇതിനായി പിന്തുടരുന്നത്. ഭാരതത്തില് ഏറ്റവും പ്രചാരമുള്ള ഭാഷാരാമായണമാണ് അവധി ഭാഷയില് എഴുതപ്പെട്ട രാമചരിതമാനസ്.
ശ്രീരാമ ഭക്തിക്ക് പേരുകേട്ട വൈഷ്ണവ സംന്യാസിയും കവിയുമായിരുന്നു ഗോസ്വാമി തുളസിദാസ്. പതിനാറാം നൂറ്റാണ്ടില് (1532 1623) സന്ത്് തുളസീദാസ് രാമചരിതമാനസ് രചിച്ച അതേ സ്ഥലത്താണ് തുളസി മാനസ് മന്ദിര് സ്ഥിതി ചെയ്യുന്നത്. രാമായണത്തെ ഉത്തരഭാരതത്തില് ജനകീയമാക്കിയതില് രാമചരിതമാനസ് വഹിച്ച പങ്ക് വലുതാണ്. പ്രശസ്തമായ ‘ഹനുമാന് ചാലിസ’ രചിച്ചതും തുളസീദാസാണ്.
ക്ഷേത്രഭിത്തികളില് രാമചരിതമാനസിലെ വരികള് കൊത്തിവെച്ചിട്ടുണ്ട്. വായനയിലൂടെ ഭക്തിപ്രഹര്ഷമേകുന്ന വിശുദ്ധ ഗ്രന്ഥം പോലെയാണ് തുളസീ മാനസ് മന്ദിര് നിലകൊള്ളുന്നത്. അസ്സി ഘാട്ടിന് സമീപത്താണ് ഈ മന്ദിര്. തുളസീദാസ് ജീവിതത്തിന്റെ വലിയൊരു ഭാഗവും ധ്യാനപൂര്വം ചെലവിട്ടത് അസ്സി ഘാട്ടിലാണ്. പുണ്യപുസ്തകങ്ങള് ഗ്രന്ഥശാലകളില് മാത്രം ഒതുങ്ങുന്ന വര്ത്തമാനകാലത്ത്, രാമായണസന്ദേശം സജീവമായി നിലനിര്ത്തുന്ന ഇടമായി തുളസി മാനസ് മന്ദിര് മാറുന്നു.
ജന്മഭൂമി ഓണ്ലൈന്