ന്യൂദല്ഹി : കോക്രോച്ച് ജനതാ പാര്ട്ടിയുടെ പ്രതിഷേധങ്ങളെക്കുറിച്ചുള്ള ഹര്ജിയുമായി ബന്ധപ്പെട്ട് തന്റെ പേരില് മാദ്ധ്യമങ്ങള് നടത്തിയത് തെറ്റായ റിപ്പോര്ട്ടിംഗ് ആണെന്ന് സുപ്രിം കോടതി ചീഫ് ജസ്റ്റിസ് സൂര്യകാന്ത് കുറ്റപ്പെടുത്തി. ജന്തര്മന്തറിലെ വിദ്യാര്ത്ഥി പ്രക്ഷോഭകര്ക്കെതിരെ പൊലീസ് അതിക്രമം കാണിക്കുന്നുവെന്ന് ആരോപിക്കുന്ന ഒരു ഹര്ജി ലിസ്റ്റ് ചെയ്യാന് 22 ന് ചീഫ് ജസ്റ്റിസ് കാന്ത് വിസമ്മതിച്ചതായി വന്ന വാര്ത്തയോട് പ്രതികരിക്കുകയായിരുന്നു അദ്ദേഹം. അത്തരം ഒരു ഹര്ജിയും സമര്പ്പിച്ചിട്ടില്ലെന്നും തുറന്ന കോടതിയില് ചീഫ് ജസ്റ്റിസ് പറഞ്ഞു.
നീറ്റ് ചോദ്യപേപ്പറുമായി ബന്ധപ്പെട്ട കേസ് പരിഗണിക്കുന്നതിനിടെ, പൊലീസ് വിദ്യാര്ത്ഥികള്ക്കെതിരെ അതിക്രമം കാണിക്കുന്നുവെന്ന് ഒരു അഭിഭാഷകന് പരാമര്ശിച്ചിരുന്നു. അപ്പോഴാണ് ‘ദയവായി ഞങ്ങളുടെയും നിങ്ങളുടെയും സമയം പാഴാക്കരുത്. നിങ്ങളുടെ സമയം ഞങ്ങളുടെ സമയത്തേക്കാള് വിലപ്പെട്ടതാണ്.’ എന്ന പ്രതികരണമുണ്ടായത്. അതാണ് ആളുകള് അശ്രദ്ധമായി റിപ്പോര്ട്ട് ചെയ്തത്. ഞാന് രജിസ്ട്രിയില് പരിശോധിച്ചു, ഒരു രേഖയും ഫയല് ചെയ്തിട്ടില്ല, ചീഫ് ജസ്റ്റിസ് പറഞ്ഞു.
