ന്യൂദല്‍ഹി: വിദ്യാര്‍ത്ഥികളെ രാഷ്‌ട്രീയ ആയുധമായി ഉപയോഗിക്കുന്ന പ്രതിപക്ഷ പാര്‍ട്ടികള്‍ക്കെതിരെ രൂക്ഷവിമര്‍ശനവുമായി കേന്ദ്രപ്രതിരോധമന്ത്രി രാജ്നാഥ് സിങ്. കോക്രോച്ച് പാര്‍ട്ടിയ്‌ക്ക് പിന്നാലെ കോണ്‍ഗ്രസ്, സിപിഎം അടക്കമുള്ള പ്രതിപക്ഷ പാര്‍ട്ടികള്‍ നടത്തുന്ന രാഷ്‌ട്രീയ നാടകങ്ങള്‍ക്കെതിരെയാണ് പ്രതിരോധമന്ത്രി രംഗത്തെത്തിയിയത്.
രാഷ്‌ട്രീയ താത്പര്യങ്ങള്‍ സംരക്ഷിക്കുന്നതിനായി പ്രതിപക്ഷം വിദ്യാര്‍ത്ഥികളെയും യുവാക്കളെയും രാഷ്‌ട്രീയ ആയുധങ്ങളായി ഉപയോഗിക്കുകയാണെന്ന് രാജ്നാഥ് സിങ് കുറ്റപ്പെടുത്തി. ദല്‍ഹിയിലെ പ്രതിഷേധങ്ങള്‍ ആശങ്കയുണ്ടാക്കുന്ന കാര്യമാണെന്നും എക്സില്‍ അദ്ദേഹം കുറിച്ചു. യുവാക്കളെ വഴിതെറ്റിക്കാനുള്ള ശ്രമങ്ങള്‍ നിര്‍ഭാഗ്യകരമാണ്. എന്നാല്‍ വിവേകശാലികളായ യുവാക്കള്‍ ഇത്തരം വഞ്ചനാപരമായ ശ്രമങ്ങള്‍ തിരിച്ചറിയുമെന്നും അവര്‍ വികസനത്തിന്റെയും രാഷ്‌ട്രനിര്‍മാണത്തിന്റെയും പാത തെരഞ്ഞെടുക്കുമെന്നും അദ്ദേഹം പറഞ്ഞു.
യുവാക്കളുടെയും വിദ്യാര്‍ത്ഥികളുടെയും ആശങ്കകള്‍ പരിഹരിക്കാനും അവരുടെ ആഗ്രഹങ്ങള്‍ക്കൊപ്പം നില്‍ക്കാനും നരേന്ദ്ര മോദി സര്‍ക്കാര്‍ പ്രതിജ്ഞാബദ്ധമാണെന്ന് അദ്ദേഹം വ്യക്തമാക്കി. പാര്‍ലമെന്റ് സമ്മേളനം നടന്നുകൊണ്ടിരിക്കുന്ന സാഹചര്യത്തില്‍ ഏത് വിഷയത്തിലും സംവാദത്തിന് സര്‍ക്കാര്‍ തയാറാണ്. എന്നാല്‍, വിഷയങ്ങള്‍ പാര്‍ലമെന്റില്‍ ചര്‍ച്ച ചെയ്യുന്നതിന് പകരം തെരുവിലേക്ക് വലിച്ചിഴയ്‌ക്കാനാണ് പ്രതിപക്ഷം ശ്രമിക്കുന്നത്. പ്രതിപക്ഷത്തിന് ആത്മാര്‍ത്ഥതയുണ്ടെങ്കില്‍ വര്‍ഷകാല സമ്മേളനത്തിന്റെ സുഗമമായ നടത്തിപ്പിന് തടസമുണ്ടാക്കാതെ, പാര്‍ലമെന്റിനുള്ളില്‍ എല്ലാ വിഷയങ്ങളും ഉന്നയിച്ച് രാജ്യത്തിന്റെ ശ്രദ്ധ ആകര്‍ഷിക്കുകയാണ് വേണ്ടതെന്നും അദ്ദേഹം പറഞ്ഞു.
