ന്യൂജേഴ്സി: ലോകകപ്പ് ഫുട്ബോള് വീക്ഷിക്കുന്നതിനായി ലോക മെമ്പാടും മൂവായിരത്തോളം അനധികൃത വെബ്സൈറ്റുകള് പ്രയോജനപ്പെടുത്തിയതായി വെളിപ്പെടുത്തല്. അമേരിക്കയിലെ യുഎസ് ഡിപ്പാര്ട്ട്മെന്റ് ഓഫ് ജെസ്റ്റീസ്(ഡിഒജെ) പുറത്തുവിട്ട കണക്കാണിത്.
ടൂര്ണമെന്റ് നടന്നുകൊണ്ടിരിക്കെ അമേരിക്കയില് മാത്രം ആയിരത്തിലേറെ ഡൊമെയ്നുകള് ഷട്ട്ഡൗണ് ചെയ്തതായി പ്രമുഖ വിദേശ മാധ്യമം റിപ്പോര്ട്ട് ചെയ്തു. ഇത്രയും സൈറ്റുകള് കൊളംബിയയിലും ബ്ലോക്ക് ചെയ്യപ്പെട്ടു. ഇതിനെതിരെ അമേരിക്കയിലും തെക്കേ അമേരിക്കയിലെ വിവിധ പ്രദേശങ്ങളിലുമായി ഓപ്പറേഷന് ഓഫ് സൈഡ് എന്നും ഓപ്പറേഷന് റെഡ് കാര്ഡ് എന്നും പേര് നല്കി അന്വേഷണം ആരംഭിച്ചുകഴിഞ്ഞു.
അനധികൃതമായി ലോകകപ്പ് മത്സരങ്ങള് തത്സമയം സംപ്രേഷണം ചെയ്ത വെബ്സൈറ്റുകള് വഴി ഏര്പ്പെട്ടത് തന്ത്രപൂര്വ്വമായ സ്വത്തവകാശത്തെ കൊള്ളയടിക്കലാണെന്ന് അമേരിക്കയിലെ നാഷണല് ഇന്റെലെക്ച്വല് പ്രോപ്പര്ട്ടി റൈറ്റ്സ് കോര്ഡിനേഷന് സെന്റര്(എന്ഐപിആര്സിസി) ഡയറക്ടര് ഇവാന്.ജെ.ആര്വെലോ പറഞ്ഞു. ഇത്തരം ചെയ്തികള് ലോകകപ്പിന്റെ സുഖമമായ സംപ്രേഷണ പദ്ധതിക്ക് വലിയ തോതില് മങ്ങലേല്പ്പിച്ചു. ഇതുമായി ബന്ധപ്പെട്ട് കൊളംബിയയില് നിരവധി അറസ്റ്റുകള് നടന്നതായി റിപ്പോര്ട്ടുകളുണ്ട്.
