തിരുവനന്തപുരം : പ്രധാനമന്ത്രി നരേന്ദ്രമോദിയുടെ വസതിക്ക് മുന്നില്‍ സമരം നടത്തിയ രാഹുല്‍ ഗാന്ധി ഉള്‍പ്പെടെയുള്ള കോണ്‍ഗ്രസ് നേതാക്കളെ പൊലീസ് അറസ്റ്റ് ചെയ്തതില്‍ പ്രതിഷേധിച്ച് കേരളത്തില്‍ വിവിധയിടങ്ങളില്‍ യൂത്ത് കോണ്‍ഗ്രസ്, കെഎസ്യു പ്രകടനം.തിരുവനന്തപുരം നഗരത്തില്‍ ഏജീസ് ഓഫീസിലേക്കും ലോക്ഭവനിലേക്കും പ്രവര്‍ത്തകര്‍ പ്രകടനം നടത്തി. മന്ത്രിയും കെ പി സി സി അധ്യക്ഷനുമായ സണ്ണി ജോസഫിന്റെ നേതൃത്വത്തിലാണ് ലോക്ഭവനിലേക്ക് പ്രതിഷേധ പ്രകടനം നടത്തിയത്. കെ എസ് യു അധ്യക്ഷന്‍ അലോക്ഷ്യസ് സേവിയര്‍ അടക്കം ബാരിക്കേഡിന് മുകളില്‍ കയറി പ്രതിഷേധിച്ചു.പൊലീസുമായി ഉന്തും തളളുമുണ്ടായി.
എറണാകുളം എം ജി റോഡില്‍ യൂത്ത് കോണ്‍ഗ്രസ് പ്രവര്‍ത്തര്‍ റോഡ് ഉപരോധിച്ചു.ആലപ്പുഴയില്‍ കായംകുളത്ത് യൂത്ത് പ്രവര്‍ത്തകര്‍ വഞ്ചിനാട് എക്‌സ്പ്രസ് ട്രെയിന്‍ തടഞ്ഞു. കൊല്ലം കുണ്ടറയിലും കേരളപുരത്തും കോണ്‍ഗ്രസ് പ്രതിഷേധ പ്രകടനം നടത്തി. പാലക്കാട് ചിറ്റൂരിലും പ്രതിഷേധ പ്രകടനം നടന്നു. പ്രധാനമന്ത്രി നരേന്ദ്രമോദിയുടെയും ആഭ്യന്തര മന്ത്രി അമിത് ഷായുടെയും കോലം കത്തിച്ചു.
നീറ്റ് പരീക്ഷാ പേപ്പര്‍ ചോര്‍ച്ചയില്‍ കേന്ദ്രവിദ്യാഭ്യാസമന്ത്രി ധര്‍മേന്ദ്ര പ്രധാന്റെ രാജി ആവശ്യപ്പെട്ട് പ്രധാനമന്ത്രിയുടെ വസതിക്ക് മുന്നില്‍ പ്രതിഷേധിച്ച രാഹുല്‍ ഗാന്ധി, പ്രിയങ്ക ഗാന്ധി, കെ സി വേണുഗോപാല്‍ ഉള്‍പ്പെടെയുള്ള നേതാക്കളെ ദല്‍ഹി പൊലീസ് അറസ്റ്റ് ചെയ്ത് നീക്കിയിരുന്നു. കേന്ദ്രമന്ത്രി ജിതേന്ദ്ര സിംഗ് നേരിട്ടെത്തി രാഹുല്‍ ഗാന്ധിയുമായി ചര്‍ച്ച നടത്തിയിട്ടും നേതാക്കള്‍ വഴങ്ങാതെ വന്നതോടെയാണ് പൊലീസ് അറസ്റ്റിലേക്ക് നീങ്ങിയത്.
