തിരുവനന്തപുരം: പിണറായി വിജയന് മുഖ്യമന്ത്രി ആയിരിക്കെ നടത്തിയ നവകേരളയാത്രയ്ക്കിടെ ആലപ്പുഴയില് വച്ച് കരിങ്കൊടി കാണിച്ച യൂത്ത് കോണ്ഗ്രസ് നേതാക്കളെ ഗണ്മാന് അടക്കം തല്ലിച്ചതച്ച കേസ് അട്ടിമറിക്കാന് ശ്രമിച്ചെന്ന ആരോപണം നേരിടുന്ന എ.ഡി.ജി.പി എം.ആര് അജിത്കുമാര് ഡി.ജി.പിക്ക് വിശദീകരണം നല്കി.പ്രത്യേക അന്വേഷണ സംഘത്തിന്റെ റിപ്പോര്ട്ടില് തനിക്കെതിരെയുളള പരാമര്ശങ്ങള് എം.ആര് അജിത്കുമാര് നിഷേധിച്ചെന്നാണ് സൂചന. വിശദീകരണം പരിശോധിച്ച് തീരുമാനം എടുക്കുമെന്ന് ഡി.ജി.പി വ്യക്തമാക്കി.
അജിത് കുമാറിന്റെ മറുപടി വിലയിരുത്തി ഡിജിപി സ്വന്തം ശുപാര്ശ കൂടി കൂട്ടിച്ചേര്ത്ത് സര്ക്കാരിന് അന്തിമ റിപ്പോര്ട്ട് കൈമാറും. എം.ആര്. അജിത് കുമാറിന് ഡി ജി പി പദവി നല്കുന്നതിനുളള സ്ക്രീനിംഗ് കമ്മിറ്റി കൂടാനിരിക്കെയാണ്.ഇതിന് മുന്പ് തന്നെ ഡിജിപി സര്ക്കാരിന് റിപ്പോര്ട്ട് നല്കുമോ എന്നാണ് എല്ലാവരും ഉറ്റുനോക്കുന്നത്.
കേസില് തുടരന്വേഷണ റിപ്പോര്ട്ട് ഏതാനും ദിവസങ്ങള്ക്ക് മുന്പാണ് പ്രത്യേക അന്വേഷണ സംഘം ഡിജിപിക്ക് കൈമാറിയത്. എന്നാല്, ചില വിഷയങ്ങളില് കൂടുതല് വ്യക്തത ആവശ്യപ്പെട്ട് ഡിജിപി ഈ റിപ്പോര്ട്ട് തിരിച്ചയച്ചു.
പിന്നാലെ ചില രേഖകള് തിരുത്താന് എഡിജിപി എം.ആര്. അജിത് കുമാര് നിര്ദേശം നല്കിയതിന്റെ സ്ക്രീന്ഷോട്ടുകള് അടക്കം, അദ്ദേഹത്തിന്റെ പേര് എടുത്തുപറഞ്ഞുകൊണ്ട് എസ്ഐടി റിപ്പോര്ട്ട് വീണ്ടും സമര്പ്പിച്ചു. ഈ തെളിവുകളുടെ അടിസ്ഥാനത്തിലാണ് അജിത് കുമാറിനോട് ഡിജിപി മറുപടി ആവശ്യപ്പെട്ടത്.
