ന്യൂദല്ഹി: ത്രിപുര ഡിജിപി അനുരാഗ് ധന്കറിന്റെ മരണത്തില് അന്വേഷണം പ്രഖ്യാപിച്ച് സംസ്ഥാന സര്ക്കാര്. ധന്കറിനെ അഗര്ത്തലയിലെ പോലീസ് ആസ്ഥാനത്തെ കുളിമുറിയില് തൂങ്ങിമരിച്ച നിലയില് കണ്ടെത്തുകയായിരുന്നു. മൃതദേഹം ജിബി പന്ത് ആശുപത്രി മോര്ച്ചറിയില് സൂക്ഷിച്ചിരിക്കയാണ്.
‘ആത്മഹത്യയാണോ എന്ന് പോസ്റ്റ്മോര്ട്ടത്തിന് ശേഷമേ സ്ഥിരീകരിക്കൂ’വെന്ന് ഡോക്ടര്മാര് പറഞ്ഞു. സംഭവത്തെ തുടര്ന്ന് ത്രിപുര മുഖ്യമന്ത്രി മണിക് സാഹയും മറ്റ് സര്ക്കാര് ഉദ്യോഗസ്ഥരും ആശുപത്രിയിലെത്തി. കൊസോവോയിലെ യുഎന് മിഷനിലും കേന്ദ്ര ഡെപ്യൂട്ടേഷനില് സിബിഐയിലും സിഐഎസ്എഫിലും അനുരാഗ് ധന്കര് സേവനമനുഷ്ഠിച്ചിട്ടുണ്ട്. സിബിഐയില് ജോയിന്റ് ഡയറക്ടറും അഡീഷണല് ഡയറക്ടറുമായിരുന്നു. ആഭ്യന്തര മന്ത്രാലയത്തിന് കീഴില് സിഖ് വിരുദ്ധ കലാപം അന്വേഷിച്ച എസ്ഐടിയുടെ ചെയര്മാനായിരുന്നു. സ്തുത്യര്ഹ സേവനത്തിനുള്ള പോലീസ് മെഡലും വിശിഷ്ട സേവനത്തിനുള്ള രാഷ്ട്രപതിയുടെ പോലീസ് മെഡലും ലഭിച്ചിട്ടുണ്ട്.
മരണവുമായി ബന്ധപ്പെട്ട സാഹചര്യങ്ങള് അന്വേഷണത്തിന് ശേഷം വ്യക്തമാകുമെന്ന് ത്രിപുര ബിജെപി പ്രസിഡന്റ് അഭിഷേക് ഡെബ്രോയ് പറഞ്ഞു.
‘അന്വേഷണത്തില് ഒരു വിട്ടുവീഴ്ചയുമില്ല. സത്യം പുറത്തുവരും. എന്താണ് സംഭവിച്ചതെന്നും എന്തുകൊണ്ട് സംഭവിച്ചുവെന്നും അന്വേഷണത്തില് വ്യക്തമാകും,’ അദ്ദേഹം പറഞ്ഞു.
