തിരുവനന്തപുരം: കേള്‍വിക്കാരെ പൊട്ടിച്ചിരിപ്പിക്കാന്‍ ഉദ്ദേശിച്ച് ധ്യാന്‍ ശ്രീനിവാസന്‍ നടത്തിയ പരാമര്‍ശത്തിനെതിരെ പൊട്ടിത്തെറിച്ച് നടന്‍ വിജയിന്റെ ഫാന്‍സ്. താൻ മുഖ്യമന്ത്രിയായി സത്യപ്രതിജ്ഞ ചെയ്യുമ്പോള്‍ വേദിയില്‍ സാരിയുടുത്ത് വിതുമ്പുന്ന കണ്ണുകളുമായി നവ്യ നായര്‍ ഉണ്ടാകണമെന്ന ധ്യാന്‍ ശ്രീനിവാസന്റെ പരാമര്‍ശമാണ് വിനയായിരിക്കുന്നത്. വിജയ് തമിഴ്നാട് മുഖ്യമന്ത്രിയായി സത്യപ്രതിജ്ഞ ചെയ്യുമ്പോള്‍ സദസ്സില്‍ സാരിയുടുത്ത് തൃഷ എത്തിയ സംഭവത്തെ പരിഹസിക്കുകയായിരുന്നു ധ്യാന്‍ ശ്രീനിവാസനെന്നും ഇതിന് മാപ്പ് പറയണമെന്നുമാണ് വിജയിന്റെ ഫാന്‍സ് ഉയര്‍ത്തുന്ന ആവശ്യം.
തമിഴ്നാട് മുഖ്യമന്ത്രി വിജയിയെ പരാമർശിച്ചുകൊണ്ട് തന്നെയാണ് തന്റെ പുതിയ സിനിമയുടെ പൂജാ പരിപാടിയില്‍ ധ്യാന്‍ ശ്രീനിവാസന്‍ പരാമർശങ്ങള്‍ നടത്തിയത്. വിജയിനെ വിമര്‍ശിക്കാനല്ല, സദസ്സില്‍ പൊട്ടിച്ചിരിയുണ്ടാക്കാന്‍ ഉദ്ദേശിച്ചായിരുന്നു ഈ തമാശയെന്ന് അംഗീകരിക്കാന്‍ പക്ഷെ വിജയ് ഫാന്‍സ് തയ്യാറല്ല.
“തമിഴ്നാട്ടില്‍ വിജയ് മുഖ്യമന്ത്രിയായപ്പോള്‍ തനിക്കും മുഖ്യമന്ത്രിയാകാൻ ഒരു ആഗ്രഹം ഉദിച്ചു അതിനുവേണ്ടി ഇറങ്ങാം എന്ന് കരുതിയിരിക്കുമ്പോഴാണ് സുഹൃത്തായ അജു വർഗീസ് പറയുന്നത് ആദ്യം അമ്മയുടെ പ്രസിഡന്‍റ് ആകൂ എന്നിട്ട് മതി മുഖ്യമന്ത്രിയെന്ന്. താൻ മുഖ്യമന്ത്രിയായി സത്യപ്രതിജ്ഞ ചെയ്യുമ്പോള്‍ വേദിയില്‍ സാരിയുടുത്ത് വിതുമ്പുന്ന കണ്ണുകളുമായി നവ്യ നായര്‍ സദസ്സില്‍ ഉണ്ടാകണം.”- ഇതായിരുന്നു ധ്യാന്‍ ശ്രീനിവാസന്റെ വാക്കുകള്‍.
